Haji Hajiji Haji Noor
KOTA KINABALU: Boyoon Montiri, Datuk Seri Haji Hajiji Haji Noor minokuanu rayat do tumilombus momuginawo rati otopot Tadau Malaysia om mamaramai dilo’ miampai sunduan mongupus pogun (patriotisme) nogi’ kopongupusan di poinralom kumaa pomogunon.
“Kanou tokou no papatantu’ pisompuruan om piuludan rayat orukut tinaru om ugama’ kotilombus ogompi’ nogi’ kotimporon id pomogunan noundaran diti,” ka disio id pason Tadau Malaysia do hiti.
Hajiji minoboros, 16tw Kosiam nopo nga’ tadau ‘keramat’ ilo’ nopo nga’ tadau pinonuridongan Malaysia.
“Sabaagi rayat Malaysia, oondos tokou kopio om mositi’ toririmo momuhondom tadau kisusuyan diti tu’ ilo’ ponokotanda’ timpu pomogunan tokou nosili kibantug om nokopimpoopori (merdeka).
“Pinonuridongan Malaysia nokoowit minogisusuai kasanangan om koundaran kumaa oinsanan nayatan mogigiyon id pomogunon diti.
“Nga’, pinamanahan monuridong pomogunon kakal anaru, noponu’ do kaantaban nogi’ kohimpogongan i nuru’ timbabaon.
“Mantad no do haro pisaan, pogiagalan om pisompuruan montok koponsolon pogun, oinsanan kaantaban diti aanu monoibau,” ka disio.
Kohondot dilo’, Boyoon Montiri minagangat oinsanan rayat Malaysia do mamarati uhu Tadau Malaysia toun diti, “Malaysia MADANI: Rakyat Disantuni”, i kopokito kopusohon nogi’ tonggungan koporintaan kohondot kotundunan rayat mimpau prinsip Malaysia MADANI.
Ilo’ po nogi’ nga’ kopiongoi di Sondikoton Sabah Maju Jaya i poposotol kasasanangan rayat, kaadangon, pisompuruan nogi’ koburuon aadas montok oinsanan rayatan mogigiyon.
