Tun Musa miampai tombului naalap pinopoindalan kopomoridisan kek kopihondot pamaramaian Ramai Kubis 2025.
KUNDASANG: Kinoingkawason nopuhu asil pogun kumaa rontob bobos akawas id susuyan nosili kointalangan ginirot om kinosonongon pomorintaan koporintaan Gabungan Rakyat Sabah (GRS), ka di Kumoduo Boyoon Montiri II, Datuk Seri Dr. Joachim Gunsalam.
Minoboros isio, asil pogun i nokosigampot RM5.49 bilion di 2021, RM6.96 bilion (2022), RM6.97 bilion di 2023 om RM6.84 di 2024 atalang nokopokito kopomorintaan id siriba’ palan Sondikoton Sabah Maju Jaya (SMJ) nakapanahak waya’ osonong kumaa koburuon ikonomi pogun.
“Naangayan diti okon ko’ numbur kusung, nga’ kopokito koporintaan kiharo nimpohon di ogirot id kopomorintaan. Asil di akawas diti no i pinadalin kumaa mogisusuai koundaran montok rayat,” ka disio ontok pinapatahak boboroson kopihondot Ramai Kubis id sinasawat Koubasanan Kundasang, di tadau baino’.
Tun Musa pinopolombus kinopoimaganan Jubli Perak ko-25 Ramai Kubis 2025.
Dr. Joachim i po nogi’ Montiri Koporintaan Koiyonon om Pomuwalaian minoboros, asil dilo’ nakapasaga’ koporintaan pinopoindalan inggisaman miagal Rumah Mesra SMJ Sikulasip Koporintaan Pogun Sabah (BKNS), kinapahakan Ponguhupan Tunai Rakyat Sabah RM300 sombulan omponguhupan ‘one-off’ RM5,000 kumaa mongingindapu’ tisan ralan soginumu’ 643 mamaramit.
Ka disio, siktor tumau om gas nga’ nakapanahak kouhupan agayo soira’ pinonuridongan SMJ Energy Sdn. Bhd. nokoposimbuat nindopuan pogun mantad RM50 riong kuminaa RM5.1 bilion, suai ko’ minonuridong lobi 1,000 kosiwatan pakarajaan wagu.
Suai dilo’, kopoopuan kohunung mantad komponi agayo sompomogunan – Kibing Solar, SK Nexilis om Esteel Enterprise – nga’ nokopongukab rinibuan kosiwatan karaja’ montok sukod wagu nokoiyonon, potilombus dino nokoponginggirot ginaras tumopong Sabah sabaagi rikoton kopoopuan.
Tun Musa (kotolu, gibang) suminasi’ pokikitanan mogonsok momoguno kinotuan kubis di Toh Puan.
Dr. Joachim i po nogi’ ADUN Kundasang minongoput, kinalantaion koburuon diti naanu pinonigampot mantad no do kaadangon pulitik i ginompi’ GRS koporintaan i otootopot manalasai kobolingkahangan kogogonopan rayat.
“GRS nokopokito no dau do songinan koporintaan di ogirot, okodou om moningkanan koponsolon rayat, nung onuan mandat insan po potontuon tokou kotilombus kalantaion diti,” ka disio pinoposotol.
Pinopolombus nogi’ isio kopongunsikohan kumaa di Molohingon Agayo Pogun Sabah, Tun (Dr.) Musa Aman om sawo, Toh Puan Faridah Tusin i nokotindapou minamaramai Ramai Kubis.
Ka disio, kinorikotan di TYT miampai rayat kopokito tonggungan kopomuruanan pogun kohondot kasasanangan mogigiyon, kosuul no id Kundasang.
“Bayahan kumaa koinsanai bohogian i pinapalantoi Ramai Kubis di ko-25 diti,” ka disio.
Nokotindapou nogi’ Montiri Kousinan po nogi ADUN Karanaan, Datuk Seri Masidi Manjun; Puru Parlimen Ranau, Datuk Jonathan Yasin; ADUN Sinili, Datuk Amisah Yassin; Upisor Watas Ranau sabaagi Monontuduk Ababayan Ramai Kubis, Tinus Manggam; Ponorikohon Manganganjur Ramai Kubis, Datuk Japiril Suhaimin om tongo’ luguan koupisan Watas Ranau.
