Hajiji om Safar nonuan kopointalangan di Mohd. Yusmanizam.
KOTA KINABALU: Boyoon Montiri, Datuk Seri Haji Hajiji Haji Noor minomolohou iso’ mitingan naarau-arau id Sri Gaya do hiti di tadau baino’, kohondot kakasahan kapangabaan lotirik agayo i nokopongumpadan tisan kosilahon Sabah di konihab (13tw Kosiam).
Luguan Upisor Karaja’ Sabah Electricity, Ir. Mohd. Yusmanizam Mohd. Yusof i po nogi’ komander kokusutan popoindalan karaja’ koponondulian pangaba’, id kopointalangan disio minoboros, kakasahan pangaba’ dilo’ mantad no do kinotuhanon menara 275kV Kolopis-Segaliud i norulun do tana’ notuhan id Kampung Sarapung, Penampang.
Kopointalangan dilo’ notindapou nogi’ di Monunurat Koporintaan Pogun, Datuk Seri Sr. Safar Untong i po nogi’ Potunud Puruankuasa’ Ponguludan Kadaaton Pogun, om nogi’ Potunud Kounsol Koumoligan Negara (MKN) Sabah, Datuk Yahya Sulaiman.
Yusnizam minoboros, tiim kokusutan Sabah Electricity noondo id kinoiyonon montok popoindalan karaja’ ngaawi’ pongoputan kawagu piromutan kapaatadan Kolopis-Segaliud.
Pinopoilo isio, nung koyuon tawan kapasaga’, karaja’ pongoputan pangaba’ dilo’ pikikiro aanu momongo suang timpu duo tadau.
“Pinoilo oku do koyuon haro ‘risiko’ akawas id karaja’ ponondulian diti, om sundung pia do lumansan tokou aanu momongo oruhai, id timpu miagal pokionuon ku yolo’ do monidsorou nogi’,” ka disio.
I Hajiji minonuhu’ nogi’ do Sabah Electricity do toririmo popoilo kinoburuon karaja’ kumaa tulun ginumuan om miontong do koyuyuon id kinoiyonon nosusuhut koyuon tawan araat di po’ompus.
