Molohingon Kampung Tiong Gondohon, Charles Ahkiau Boliking pinopotuduk di Joniston ralan pomutanaman i kopopongo id kampung disio.
KIULU: Koporintaan pogun buruanon Gabungan Rakyat Sabah (GRS) nokoposurat naangayan di agayo kopio montok Sabah, potilombus dino nakapananda’ rontob nung piadangon di pomorintaan nokopogulu, ka di Luguan Kopointalangan GRS, Datuk Joniston Bangkuai.
Minoboros isio, rikod GRS nokopokito no do kogoosan miampai asil pogun bobos akawas id susuyan, rizab pogun bobos ogirot om kopoobian bobos agayo i noumbalan pinapatahak kumaa tikid watas Lintuhun Undangan Pogun (DUN).
Monguhup Montiri Ponombuluyan, Koubasanan om Sandad Posorili’ dilo’ minoboros, toun nakatalib asil pogun nokosigampot rikod RM6.9 bilion naamot rizab pogun noondo kiginumu’ RM8.7 bilion.
“Naangayan diti kopokito GRS otootopot songinan koporintaan i pinopokito asil atalang om aanu adangon montok rayat. Pinopointutun tokou mogisusuai inggisaman wagu montok koundaran rayat i amu’ naanu pinopoindalan di koporintaan nokopogulu, kosuul no koporintaan Parti Warisan,” ka disio.
“Id Kiulu, kinosimbanon di okito tokou amu’ insan kaantakan pogulu diti. Amu’ insan id susuyan kahandaman tokou nakaanu pinopoobi’ RM1.5 riong montok nopo do ralan pomutanaman tu’ tikid ADUN karamit kopoobian toun-toun bobos akawas kiginumu’ RM4 riong.
“Montok po nogi’ do kumoinsan, nakaanu tokou pinoposodia’ lobi 120 tinan walai Sabah Maju Jaya (SMJ) montok paganakan di bobos momoguno kopio,” ka disio ontok tuminindapou Ababayan Osuau Rayat id Kampung Tiong, do hiti, konihab.
Puru Lintuhun Undangan Pogun (ADUN) Kiulu dilo’ pinoposotol do naangayan diti naanu minonigampot mantad no kaadangon pulitik GRS nogi’ koponguludan kousinan di osonong.
Wookon kinalantaion agayo piomungan dilo’ nopo nga’ nakaanu Geran Pinotomod Pisompuruan kiginumu’ RM600 riong, pinopikogos Pibatosan Piuhupan Komersial (CCA) i nakaanu riniongan ringgit asil kumaa pogun, nogi’ pinapatantu’ kopoobian rikod di potitilombus kapanahak koundaran kumaa rayat.
“Naangayan diti aiso’ koiradon. Aiso’ koporintaan suai i kaanu popowonsoi nunu i nosigampot GRS id timpu oruhai, om iti nopo nga’ timpuunon nog’.
“Soira’ asil Sabah kotilombus koingkawas, kapatahak tokou lobi kogumu’ po kumaa rayat… waya’ diti mositi’ tilombuson mooi do komogoton Sabah amu’ ohimpogongan,” ka disio.
Minongunsub nogi’ isio mongungundi’ magadang do GRS mimpau rikod naangayan dau, om pinoposotol kotilombuson om kaadangon nopo nga’ oponsol dumontol pomilian agayo pogun do orikot.
