Hajiji om dif ngaawi’ naalap suai guminambar miampai wookon mantad tongo’ mamaramit Gaa’ Surupukaraja’ Abantug 2024.
KOTA KINABALU: Koupisan Tana’ om Sukat (JTU) Sabah nokoposurat naangayan kopoondos soira’ nakalanoti pinopoindalan 11 mantad 12 Potuduk Naangayan Agayo (KPI) Sondikoton Sabah Maju Jaya (SMJ) montok toun 2024 miampai nosigampot koinsanai kiginumu’ 92 pihatus.
Boyoon Montiri, Datuk Seri Haji Hajiji Haji Noor minoboros, kinalantaion dilo’ potilombus dino nokopokito tonggungan akawas puru JTU id kapanahakan surupukaraja’ bobos osonong kumaa rayat om pogun.
“Naangayan nopo diti nga’ asil karaja’ agaras, tonggungan nogi’ koyuon karaja’ abantug puru koupisan. Montok poiradan, nohupu asil tana’ i pinatantu’ soginumu’ RM281 riong di 2024, naanu minonolimbamban miampai nopuhu nokosigampot RM290.87 riong toi 104 pihatus.
“Suai dilo’, soginumu’ 55.670 upalai tana’ notompuan nung piadangon di rikoton 45,000 upalai, naamot pinonukatan Tana’ Adat Mamasok Pogun (NCR) nopo nokosigampot 17,701.50 hektar nung piadangon di rikoton 15,000 hektar,” ka disio ontok pinopoimagon Ramai Pongunsikohan Gaa’ Surupukaraja’ Abantug (APC) 2024 JTU id Longkod Konvensyen Sompomogunan Sabah (SICC) do hiti, id tadau baino’.
Hajiji pinopowonsoi gimik kinopoimpuunan om ‘montaj’ Galeri PANTAS kopihondot Ababayan Kopongunsikohan Gaa’ Surupukaraja’ Abantug (APC) Koupisan Tana’ om Sukat toun 2024 id Kota Kinabalu di tadau baino’.
Hajiji pinoposotol, kinalantaion JTU pinopoimagon 83 koiyonon pinoopi’ kampung nung piadangon rikoton 80 koiyonon nogi’ koburuon tolu sistem wagu id piromutan – Sistem Pongoputan Lisin Kopongingiyonon Naamot (TOL), Sistem Kopogirotankuasa’an Tana’ om ‘Aplikasi 3D Building’ – nopo nga’ kointalangan ponginsomokan koupisan di haro kinomogoton om kopiongoi kopomogunaan maso-maso.
Pinosotol nogi’ disio koponsolon Ababayan Ponukatan Tana’ Adat Mamasok Pogun Sabah (PANTAS) i kakal sabaagi ababayan agayo koporintaan pogun id kopomojominan kopotutan kosongonuan tana’ mamasok.
“Pointonod pinoindalan di 2011, koporintaan Pisompuruan maya’ Unit Ponguludan Kopoindalanan (ICU) Koupisan Luguan Montiri pinapatahak RM251.34 riong montok ababayan diti. Gisom wulan Koonom 2025, soignumu’ 488,705 ekar kopohompit 70,436 lot tana’ adat naanu minonukat.
“PANTAS nakapanahak waya’ agayo tu’ nokoponguhup mamasok pogun Sabah sumanganu tana’ sondiri. Inggisaman diti tilombuson papagaras maya’ kinopoimpuunan Galeri Surupukaraja’ Tana’ Mamasok Pogun (PANTAS) i nosili kokitanan tinonggungan koupisan nogi’ intodonon toilaan om pomusarahan montok sukod dumontol,” ka disio.
Hajiji minonongkounsikou nogi’ kumaa oinsanan mamaramit APC 2024 om pinoposorou diolo’ mooi do poposili kinopongokunan dilo’ sabaagi pongunsuban montok tumilombus mongingkawas naangayan surupukaraja’ koporintaan.
“Nubasanan karaja ‘kreatif’ om ‘inovatif’ nuru’ posunion montok papatantu’ sistem kapatahakan lobi kogirot om kiwaya’. tonggungan di po’ompus oponsol kopio montok papatantu’ Sabah kotilombus koburu’ kopiongoi di Palan Koburuon Sondikoton Sabah Maju Jaya,” ka disio.
