Hajiji om Montiri Tadon Tulun, Steven Sim guminambar miampai tongo’ mongobi’ koisaan sakaraja’.
PENAMPANG: Koporintaan pogun mamaramit kinorikotan koisaan sakaraja’ sabaagi tambalut ‘strategik’ (kohunung), ka di Boyoon Montiri Datuk Seri Haji Hajiji Haji Noor.
“Id palan karaja’ koburuon wagu di lobi kopotonggoi ngaawi’ diti, rolou koisaan sakaraja’ nuru’ kinongohon om onuan pomodulianan pointopot. Iti okon nopo ko’ kopohompit kobolingkahangan gaji om koundaran, nga nogi’ id kapamalanan katatapan, pamalanan ikonomi, balajaran, pomogunaan tiknologi nogi’ mongimbulai koyuon karaja’ timpu dumontol di lobi kogirot.
“Otumbayaan oku Sabah kiharo kosiwatan montok sumili pogun ombitanan id Malaysia doid kopoburuan ekosistem pakarajaan i okon nopo ko’ kopogura’ ikonomi ogirot nga nogi’ monimbuat tongo’ kopotutan pakakaraja’,” ka disio id pinaparamaian Tadau Koisaan Sakaraja’ Nayatan Pogun id International Technology and Commercial Centre (ITCC) do hiti, di baino’.
Hajiji pinapatahak bondira kumaa kontinjen Sabah montok tumanud pialaan Sipoot Pakakaraja’ (Super) kumoinsan i pohoroon id Pulau Pinang do wulan Kosiam diti.
Boyoon Montiri minoboros, koporintaan pogun pointotopot id kapagarasan ginoris karaja’, monokodung kapapanahan koisaan sakaraja’ om papatantu’ kotundunan diolo’ kotilombus oumoligan.
“Kalansanan ku pitimungan diti kosili impohon montok dati’ monginggirot sunduan koisaan om piuhupan montok monuridong timpu dumontol di lobi kanawau montok Sabah,” ka disio.
Ka di Hajiji, id siriba’ ababayan koburuon Sondikoton Sabah Maju Jaya (SMJ), koporintaan pogun minanahak koposuulan kumaa pipiro poguluonon oponsol, kaampai monginggirot piuhupan kosudong miampai Komontirian Intodonon Tulun (KESUMA).
“Piuhupan diti oponsol montok popoinggayo kopulion pongumoligan sosial om koumoligan kumaa oinsanan pakakaraja’, kaampai yolo’ id siktor amu’ ‘formal’ i sasaru’ koindisan.
“Manu tokou papatantu’ tikid rayat Sabah, i potuu id koiyonon labus kakadayan toi kakadayan, oonuan kosiwatan aadang montok popouhup om kaanu koundaran mantad koburuon pogun,” ka disio.
“Okito ku pitimungan diti okon ko’ pitimungan toomod nopo, nga’ i kumoinsan kaagal diti id Sabah i kopotimung dati’ do poinggumu’, koponokotanda’ timpu wagu montok tinimungan koisaan sakaraja’ id pogund iti.
“Iti nopo nga’ titik kotimpuunon kumaa koguraon di lobi koulud om kopotonggoi ngaawi’ mimpau sunduan Sabah Maju Jaya,” ka disio.
Minoboros isio, pogun diti nokoposurat ginoris karaja’ kolobi 1.7 riong tulun di toun nakatalib om kouhupan koinsanai ginoris karaja’ dilo’ nokounsub kinoingkawason Kolobusan Suang Pogun Kasar (KDNK) Sabah kuminaa RM84.3 bilion.
“Iti nokouhup nogi’ kinoingkawason KDNK kosuul no id siktor ngaawi’ kritikal miagal pomutanaman, pamansaian, ponuridongan, perlombongan om kuari nogi’ surupukaraja’.
“Mimpau kointalangan kaawagu koisaan sakaraja’ id Sabah, gisom tadau diti haro 92 koisaan sakaraja’ i poinrojistor om pitamangan do Koupisan Haal Koisaan Sakaraja’ Sabah, kapaampai 23 koisaan siktor koporintaan, 52 siktor swasta om 16 tinan kikanun.
“Iti kopohompit ginumu’ kosompuruan kiginumu’ 60,764 tulun, miampai 22,317 puru mantad siktor koporintaan, 35,194 mantad siktor swasta om 3,253 mantad tinan kikanun,” ka disio.
Kopiongoi di timpu ‘globalisasi’ (pomogunan aiso’ sapad) om kinoburuon tiknologi di agayo, nunsub di Hajiji koisaan sakaraja’ id Sabah mooi do lobi kaparagat id kapanamangan kotundunan puru maya’ mogisusuai inggisaman om kaparagatan i pouyuhon doid nayatan Pisompuruan om pogun.
“Hiti no tonggungan oponsol koisaan sakaraja’ sabaagi tukod id kopoudongan kaadangon sosial om papatantu’ tikid pakakaraja’ kaanu kopotutan diolo’, okon nopo ko’ id sunduk gaji di aadang, nga nogi’ kosiwatan koingkawason komilaan, koumoligan om kolidasan id karajaon, pongumoligan sosial di ogirot nogi’ koyuon karajaon di osimbayan om kounsub,” ka disio.
Minamason nogi’ isio momuruan koisaan sakaraja’ mantad Sabah i mooi ampai id Pitimungan Koisaan Sakaraja’ Nayatan Kabansaan id Pulou Pinang do ko 6tw Kosiam diti do momoguno kosiwatan dilo’ montok popolombus angkab om rolou pakakaraja’ Sabah id nayatan nasional.
