Hajiji minananud di Anwar pinopowonsoi gimik kopoimaganan pomupusan Tadau Momukabun, Momutayam om Monginsada Kabansaan (HPPNK) 2025.
KOTA KINABALU: Koporintaan pogun tumilombus tumopot papatantu’ siktor pomutanaman kotilombus kosili injin kosunion om posiau ikonomi Sabah di lobi agaras om kisinangal.
Boyoon Montiri (KM), Datuk Seri Haji Hajiji Haji Noor minoboros, siktor pomutanaman okon nopo ko’ mongunguhup kotolu bobos agayo kumaa ikonomi pogun, nga kapapanau tonggungan agayo id kojominan takanon pomogunon.
“Siktor diti kouhup soginumu’ RM12.2 bilion toi 14.5 pihatus kumaa Kolobusan Suang Pogun Kasar (KDNK) Sabah. Mantad dilo’ koporintaan pogun moningkanan do kapagarasan kaganaan diti miampai ponginsomokan lobi kosudong om poinpuli,” ka disio id Ramai Kinopoimaganan Pomupusan Tadau Momukabun, Momutayam om Monginsada’ Kabansaan (HPPNK) 2025 id Longkod Konvensyen Sompomogunan Sabah (SICC) do hiti di tadau baino’.
Luguan Montiri, Datuk Seri Anwar Ibrahim pinopoimagon pinomupusan HPPNK 2025.
Nokotindapou nogi, Montiri Pomutanaman om Kojominan Akanon, Datuk Seri Mohamad Sabu, Kumoduo Boyoon Montiri I po nogi’ Montiri Pomutanaman, Ponginsadaan om Pomorunan Akanon, Datuk Seri Dr. Jeffrey Kitingan nogi’ nuludankopomuruanan pogun om Pisompuruan.
Hajiji minananud di Anwar pinapatahak Gaa’ Perdana kuminaa di Lee Nyuk Soon @ Jason Lee mantad Sabah id Ramai pomupusan Tadau Momukabun, Momutayam om Monginsada Kabansaan (HPPNK) 2025.
Hajiji minoboros, sabaagi pogun i opuawang do intodonon tana’ oluhub om iklim tropika di kosudong montok pomutanaman, Sabah minaganu ponginsomokan kobulun id koponokodungan ababayan kojominan akanon nasional.
Ka disio, wookon laang ogirot kaampai pinonuridongan kawagu Kotinanan Parai om Wagas Sabah di toun nakatalib – soira’ sinompon di toun 1981 – montok papagaras pomorunan parai nokoiyonon om mongingkawas Rontob Kosukupan Tinan (SSL) wagas kumaa 30 pihatus dumontol 2026 om 60 pihatus dumontol 2030.
“Laang diti kopiongoi di posuulon koporintaan Pisompuruan buruanon di Anwar i manahak kopomodulianan kumaa koponsolon siktor pomutanaman, kosuul no pananaman parai om kopolobusan wagas nokoiyonon,” ka disio.
Kopiongoi di kosimbanon siktor agrotakanon pomogunon, pinosotol di Hajiji koponsolon pomogunaan tiknologi wagu miagal Internet of Things (IoT) om pomutanaman ‘pintar’ (smart farming) montok mongingkawas kopulokison kopolobusan, koonuan asil lobi akawas om mongimbayat kororohian sukod wagu.
Minoboros isio, Sabah noondo pasanganu 15 Taman Potimporon Kopolobusan Takanon (TKPM) i nakalantoi minongimbulai lobi 1,494 metrik tan asil takanon om nakapanahak somuli’ katalib RM4.32 riong gisom noondo.
Hajiji minananud id Anwar kuminakap pavilion tongo’ pogun id Ramai Pomupusan Tadau Momukabun, Momutayam om Monginsada Kabansaan (HPPNK) 2025.
Hajiji nga’ pinopoilo do kopoopuan kosudong kiwaya’ akawas kumoiso’ id siktor Ikonomi Obulou, ilo nopo nga’ koburuon dodopiton potindalan sada’ tuna om asil rahat id kitopong Koisaan Eropah id Kota Kinabalu do koporintaan pogun miampai komponi nokoiyonon miampai gatang kopoopan kosigampot RM360 riong.
Ka d isio, dodopiton dilo’ pikikiro kopotindal 50,000 tan sada tuna sontoun, miampai kosiwatan koonuan gatang ikonomi gisom RM1.8 bilion sontoun, potilombus dino kopo’iliu Sabah sabaagi wookon popoburu’ agayo pomorunan ponginsadaaan rahat alarom.
Hajiji minokianu nogi’ tinimungan momukabun, momutayam om monginsada’ id pogun diti do lobi poingukab mamaramit kosimbanon om momoguno tiknologi wagu id karaja’ pomutanaman nogi’ koponguludan kabun miampai doun kaawagu.
“Mimang tokou tinimungan diti kosili popogura’ di aparagat om koponokitopong. Timpu dumontol siktor diti tumanud kumaa ginoris diolo’ do haro inovasi om kopoinsigubas di koyuon kaawagu pomutanaman ‘moden’.
“Mimang tokou nogi’ do siktor diti kotilombus komogot, kapanahak nindopuan kumaa rayat om kosili posunduran kumaa kojominan takanon om kasasangan pogun,” ka disio.
