Haji Hajiji Haji Noor
KOTA KINABALU: Koporintaan pogun mintong kinapahabaran pinotomod di Luguan Montiri (PMX), Datuk Seri Anwar Ibrahim montok monginggaan kos balanja’ masi rayat, sabaagi potuduk kumaa nimpohon ikonomi pomgounon di ogirot id siriba’ koporintaan Madani.
Boyoon Montiri, Datuk Seri Haji Hajiji Haji Noor minoboros, koporintaan pogun mamaramit osonong inggisaman moningkanan rayat dilo’ tu’ ilo’ nopo nga’ mongingkuri’ koinggoritan i tonggungon do rayat.
“Ilo’ kopokito do i Luguan Montiri toririmo poposuul koponsolon rayat,” ka disio id iso’ kointalangan di tadau baino’.
Hajiji minoboros, ponguhupan insan bayarai kiginumu’ RM100 kumaa oinsanan mamasok Malaysia kiumur 18 poinsawat montok pomoli babarang kogogonopan id 4,100 premis pongindopuan, miampai kinopoinggaya’an ‘Jualan Rahmah Madani’ kumaa tikid koiyonon Lintuhun Undangan Pogun (DUN), nopo laang i kapanahak koundaran agayo kumaa rayat.
Pinointalang nogi’ disio do kinopoinsiribaan gatang petrol RON95 kumaa RM1.99 soliter maya’ inggisaman subsidi poinbuntuk i pikikiro kapanahak koundaran kumaa lobi 18 riong rayat Malaysia, koponumboyo’ angkab rayat.
“Kinopoimaganan sodop pogulu Tadau Malaysia (15tw Kosiam) sabaagi koundarangan ginumuan nopo nga’ iso’ kopongokunan koporintaan Pisompuruan kumaa koponsolon tadau kisusuyan kahandaman dilo’ montok pototongkop pomogunon,” ka disio.
