Masidi Manjun
KOTA KINABALU: Kabinet Sabah id mitingan di tadau baino’ pinopolulus Skim Insurans Berkelompok i kapanahak koundaran kumaa kikiro 3.5 riong mogigiyon nokoiyonon.
Montiri Kousinan, Datuk Seri Masidi Manjun minoboros, pongumoligan insurans koligaganan (Personal Accident) diti nopo nga’ aiso’ kabayar kumaa tikid mogigiyon di kosudong.
Minoboros isio, pongumoligan insurans diti maan poindalano’ maya’ komponi pasanganu koporintaan pogun Sabah, Progressive Insurance Bhd, hinombo kikiro 3.5 riong mogigiyon Sabah i kiumur pialatan sombulan gisom 80 toun miampai ‘otomatik’ kaanu insuran pongumoligan tinan miampai aiso’ kabayar i kigatang gisom RM10,000, nogi’ koundaran ‘khairat’ kapataion kiginumu’ RM500.
“Montok ponimpuunan, skim pongumoligan aiso’ kabayar nopo diti montok timpu tolu toun mimpuun ko 1tw Kolimo 2025 gisom 30tw Kaapat 2028. Maya’ karalanon ponugatan insurans di opulokis, nunu-nunu ponugatan bayaran patahakon kumaa mamaramit id timpu 14 gisom 30 tadau katalib do katahak dokumen ogonop,” ka disio id kointalangan di tadau baino’.
Masidi minoboros, skim pongumoligan insurans nopo diti nga’ iso’ po inggisaman koporintaan pogun Sabah manamong kotundunan mogigiyon, suai ko’ mongingkuri’ tonggungan kousinan mogigiyon, lolobi no yolo’ i poinsompini’ id tinimungan B40.
