Hajiji minamaramit foom kosompuruan Gagasan Rakyat mantad di Aksyah miampai bagas Luguan Raan PPBM.
SUKAU: Boyoon Montiri, Datuk Seri Haji Hajiji Haji Noor pinopogirot ginoris koporintaan Gabungan Rakyat Sabah-Pakatan Harapan (GRS-PH) Plus id kopomorintaan om koponguludan pogun diti do poinsonong.
Pinosotol disio, koporintaan buruanon dau dilo’ amu’ nopiil pinopoindalan tonggungan om karaja’ disio sabaagi pomorinta, sundung tinondos sabaagi koporintaan di nopiil do ponokosahap.
Ka disio, totondos dilo’ binsorou nopo tomod do bohogian toi tinimungan i amu’ orohian kumaa koporintaan GRS-PH Plus om amu’ kasaga’ mamaramit katapatan do koporintaan i haro noondo diti nakalantoi minamagampot ogumu’ naangayan.
“Ogumu’ i nowonsoi tokou, nga’ haro i mongomi Koporintaan GRS nopiil. Otopot nopo koporintaan GRS amu’ nopiil, poingkuro komoyon do nopiil nung minomorinta’ tokou pogun miampai osonong.
“Nakaanu tokou pinopoingkawas asil tokou, pinopoindalan koburuon om minanahak ponguhupan kumaa rayat, minongingkawas ponguhupan kumaa susumikul pototongkop Sabah mantad Tingkatan Lima om Onom gisom no kumaa univositi.
“Ingkaa nogi’ miampai PETRONAS, nakalantoi tokou pinopikogos pibatosan miampai komponi dilo’ om ilo’ wookon naangayan tokou. Nung amu’ tokou komilo mongulud pogun amu’ doti’ naantakan oinsanan diti.
“Nung komoyonon tokou do koporintaan nopiil, ilo’ binsorou tomod nopo di tinimungan amu’ orohian dati’,” ka disio id Ramai Mongukab Puasa Miampai Boyoon Montiri pinaanjur Parti Gagasan Rakyat Sabah (Gagasan Rakyat) Bohogian Sukau id natad Masjid Tun Juhar, Sukau, Kinabatangan, di konihab.
Hajiji pinapatahak toluod kumaa tinimungan asnaf.
Nokotindapou i Montiri Sains, Tiknologi om Inovasi, Datuk Dr. Mohd. Arifin Mohd. Arif, Monguhup Montiri Koporintaan Koiyonon om Pomuwalaian, Datuk Isnin Aliasnih, Monguhup Montiri Koburuon Labus Kakadayan, Datuk Samad Jamri, Ponorikohon Kotinanan Koburuon Pomuwalaian om Kakadayan (LPPB), Datuk Masiung Banah, Ponorikohon Kotinanan Komogoton Tana’ Pogun Sabah (SLDB), Datuk Abdul Ghani Mohamed Yassin, Puru Lintuhun Undangan Pogun (ADUN) Sinili, Datuk Jaffari Waliam om Luguan Bohogian Gagarasan Rakyat Sukau, Datuk Juhari Janan.
Hajiji i po nogi’ Presiden Gagasan Rakyat minoboros, otumbayaan isio do mimpau di nunu i winonsoi koporintaan babaino’ diti, rayat insan manahak mandat kumaa GRS-PH Plus, kaampai papalantoi timpohon Lintuhun Undangan Pogun (DUN) Sukau id Pomilian Agayo Pogun Ko-17 (PRN17) obontol.
“Yati’ okon ko’ irad di lansanon suai i orohian monondos om mimboros mogisusuai nga’ amu’ pinopowonsoi nunu-nunu. Yolo’ mimboros ‘kusung’ om mongudut tikid timpu kumaa rayat.
“Pokionuon ku rayat id Sukau diti kada’ kotumbaya’ai di pongungudut lansanon toi tinimungan i atantu’ diti. Mimang tokou do Sabah kotilombus komogot om mantad po nogi dilo’ nuru’ tokou monokodung GRS-PH Plus,” ka disio.
Ka disio, rayat kiguno manahak kotumbayaan kumaa Koporintaan GRS-PH Plus id PRN obontol om monungkayan piomungan dilo’ do kalantoi pomilian agayo dilo’ do orikot.
“Aadang tokou kumaa oinsanan tinaru om mogigiyon amu’ monimud nandaton diolo’ om insyaAllah, nung onuan kosiwatan, tilombuson tokou komogoton di napalan dati’ maya’ Sondikoton Sabah Maju Jaya (SMJ) kaampai id Sukau, Lamag om Kuamut Kinabatangan diti.
“Lihuan susuyan laid, umbalan tokou no iti wagu, insyaAllah kaanu tokou komogoton miagal di pinalan tokou. Inggirotan tokou pisompuruan tokou om momonsoi kosimbanon montok Sukau, Lamag om Kuamut,” ka disio.
Hajiji pinapatahak kunci walai Mesra SMJ Lintuhun Undangan Pogun (DUN) Sukau kumaa mamaramit di kosudong.
Minoboros kuminaa media talib dilo’, Boyoon Montiri minomohulit kotumbayaan disio kumaa ginaras Gagasan Rakyat om parti komponen id koporintaan noondo minonigampot di bobos osonong solinaid nosili koporintaan.
Otumbayaan nogi’ isio do rayat manahak kosiwatan kumaa koporintaan buruanon dau do monilombus inggisaman popoburu’ om mogowit mogisusuai koundaran ikonomi om kasasanangan kumaa rayat Sabah.
Karait do Sukau i baino’ diti ki’oitan watas okoro’, pinolombus di Hajiji kotumbayaan dau montok kokito watas okoro’ dilo’ do koburu’ miampai lobi kosikap po maya’ ponguludan Upis Watas Okoro’ di wagu, kosuul no siktor ponombuluyan i nosili ginaras ikonomi watas dilo’.
Id ramai dilo’, Hajiji pinapatahak toluod kumaa tinimungan asnaf, duli sikul kumaa susumikul, timpohon kiruda Koupisan Kotundunan kumaa tongo’ mamaramit om kunci walai Mesra SMJ kumaa mamaramit di kosudong.
Minamaramit nogi’ isio foom kosompuruan mantad di bagas Kumoduo Ponorikohon Piromutan Perikatan Nasional (PN) Sabah, Aksyah Nasrah miampai 11 bagas Luguan Raan Parti Pribumi Bersatu Malaysia (PPBM).
