Dr. Joachim (tanga’) guminambar miampai tongo’ mongingindapu’ i nakaramit ponguhupan kopodulianan om oinsanan i nokorikot minooi intong koyuon kinoiyonon kinotutudan.
KUNDASANG: Kumoduo Boyoon Montiri II i po nogi Puru Lintuhun Undangan Pogun (ADUN) Kundasang, Datuk Seri Dr. Joachim Gunsalam di konihab pinapatahak ponguhupan kopodulian kumaa tongo’ mongingindapu’ sinusulap kinotuan i noumpadanan gama-gama’ kinotutudan id Kundasang.
Dr, Joachim lumansan ponguhupan i pinatahak dilo’ koponginggaan koinggoritan diolo’.
Di tadau Kaapat (13tw Kotolu), kinotutudan id Kakadayan Kundasang nokoponorob walu’ premis, kaampai tolu kadai runcit, duo songkoduonon, iso’ blok walai siwa miampai 11 tobon, nogi’ songinan situr poopian barang runcit.
Dr. Joachim (koduo, gibang) om Mariana (gibang) miampai dilo suai id kinoiyonon kinotutudan.
Montiri Koporintaan Nokoiyonon om Pomuwalaian dilo’ pinopointalang do nokoilo isio kinaantakan dilo’ di maso doid Kuala Lumpur montok tuminindapou Mitingan Puruankuasa’ Teknikal MA63, i notindapou nogi’ di piipiro Montiri Kabinet.
Korikot nopo mantad Kuala Lumpur, Dr. Joachim suminikap kuminaa kinoiyonon kinaantakan do minooi intong sondiri’ do koyuon dilo’.
Id kinotombuluyan dilo’, minokinongou nogi’ isio kopointalangan mantad Lansanon Koburuon Mogigiyon (PPM), Dounis Sani; Ponorikohon Puruankuasa’ Komogoton Suang Kakadayan (JKDB), Suatin Mayor; Presiden Koisaan Papadaadagang Sinusulap Kinotuan Kundasang, Mariana Taliban; nogi’ mobi’ mantad Kounsol Watas Ranau.
Dr. Joachim (kotolu, gibang) minokinongou kopointalangan mantad di Suatin.
Dr. Joachim pinopoilo do bohogian disio mindad ruputan poinponu’ kinotutudan mantad bohogian forensik, Koupisan Bomba om Manampasi (JPBM). Kohondot dilo’, pinoilo nogi’ isio do bohogian Upis Watas om kotinanan (JPBM) dilo’ papaharo mitingan do minggu tiso montok laang potilombus.
Suai dilo’, Dr. Joachim nga’ lumansan do bohogian JKDB om Kounsol Watas kaanu monguhup monginsikap karaja’ koponuridongan kawagu premis di noinraagan, tumanud kooturan di pinatantu’.
