KOTA KINABALU: Gabungan Rakyat Sabah (GRS) mogiboboros karait di kopogiikidan timpohon Pomilian Agayo Pogun Ko-17 (PRN17) id mitingan Puru Kounsol Akawas (AMT) do tadau Minggu diti.
Tumanud ruputan Utusan Malaysia, Ponorikohon GRS, Datuk Seri Haji Hajiji Haji Noor minoboros, wookon agenda id mitingan AMT GRS i maan pohoroo’ do koompokon minggu diti nopo nga’ karait di kopogiikidan timpohon.
GRS kapaampai mantad piomungan walu’ parti ilo’ nopo nga’ Parti Gagasan Rakyat Sabah (Gagasan Rakyat), Parti Bersatu Sabah (PBS), Parti Solidariti Tanah Airku (STAR), Parti Maju Sabah (SAPP), Pertubuhan Kebangsaan Sabah Bersatu (USNO), Parti Harapan Rakyat Sabah (PHRS), Parti Liberal Demokratik (LDP) om Parti Cinta Sabah (PCS).
Id timpu diti, GRS kiharo 42 timpohon kaampai Puru Lintuhun Undangan Pogun (ADUN) sinili om miampai koinsanai dilo’, blok koporintaan GRS-PH Plus kiharo 50 timpohon mantad di 73 timpohon DUN Sabah.
Hajiji minoboros dilo’ soira’ pinokianu mongomi atag Presiden USNO, Tan Sri Pandikar Amin Mulia i mokianu GRS tumanding soroisoiso’ id koinsanai 73 timpohon DUN.
Pogulu diti, Pandikar Amin po nogi’ Kumoduo Ponorikohon GRS minomohulit ningkakaton do aiso’ kogunoon montok GRS momonsoi piupakatan pomilian agayo miampai Pakatan Harapan (PH) om Barisan Nasional (BN) id PRN Sabah i pikikiro do pintangaan toun diti.
Pandikar Amin om lansanon komponen GRS kaampai Presiden STAR, Datuk Seri Dr. Jeffrey Kitingan om Presiden SAPP, Datuk Seri Yong Teck Lee miniilang pomusarahan di miagal ilo’ nopo nga’ mokianu GRS mamamanau mimpoopori id PRN Sabah.
