KOTA KINABALU: Soginumu’ 687,031 moomoguno Sabah Electricity karamit rebat kiginumu’ 2.5 pihatus mantad ginumu’ deposit lotirik di bayaran.
Luguan Upisor Eksekutif Sabah Electricity, Ir. Ts. Mohd. Yaakob Jaafar minoboros, kopogulian rebat kiginumu’ RM10.2 riong dilo’ posuangon mitilombus kumaa akaun bil lotirik moomoguno poinrojistor miampai mogisuhut-suhut mimpuun do wulan Koiso’ 2025.
‘Rebat diti patahakon kumaa moomoguno id siriba’ Electricity Supply Enacment 2024, Licensee Supply Regulations 2024 Regulation (50) (1) hinombo pinopoilo do bohogian Sabah Electricity pokionuon momonsoi pambayaran bunga 2.5 pihatus kohondot di deposit tunai do wulan koiso’ tikid toun,” ka disio id iso’ kointalangan media.
Minoboros isio, tusin banjar intobon kopiagal duo wulan pomogunaan bil lotirik tumanud pulampai montok onom wulan kolimpupuson om intangan do tikid onom wulan.
Pomoruhangan tusin banjar poontokon no nung haro kinoingkawason pomogunaan nung piadangon di tusin banjar poinharo mantad.
Poingkuro po ka disio, nung pulampai pomogunaan okuri’ ko’ mantad tusin banjar, nga’ aanu ilo’ do pogulion kumaa moomoguno mantad kopokionuan moomoguno maya’ rebat kumaa bil lotirik diolo’.
Moomoguno kaanu maganu kointalangan potilombus miampai tumingan raan Sabah Electricity dodoros toi momoromut numbur surupukaraja’ moomoguno 15444 toi 088-515000.
Suai ko ilo’ ka disio, moomoguno nga’ kaanu nogi’ posuang aplikasi Sabah Electricity maya’ telipaun pintar montok maganu kointalangan kaawagu karait surupukaraja’ Sabah Electricity.
