Azizah om i Linda guminambar pongingitanan miampai tongo’ tutumanud sayau tinaru katalib kinapatahakan setifikit kinotonudan.
KOTA KINABALU: Koporintaan natag do papabantug koubasanan tinaru Sabah miampai poposili kopononsokotan posokoton (kostum) koubasanan tinaru Sabah sabaagi kod posokoton pinotomod id nombo-nombo ababayan koporintaan.
Presiden Perkumpulan Perempuan Sabah (PPS), Datuk Seri Azizah Mohd. Dun minoboros, kopononsokotan kostum koubasanan mantad mogisusuai tinaru id Sabah okon nopo ko’ kopokito kopogisusuaian om kinolumison koubasanan, nga nogi’ kikosiwatan do poinggoyoon sabaagi produk komosil.
Ka disio, momomonsoi kostum tinaru id pogun diti nokopomowonsoi posokoton koubasanan di mogisusuai om ongosonong, okon nopo ko’ koimbayat kororohian mogigiyon nokoiyonon nga nogi tutumombului labus.
“Montok papabantug po do kopononsokotan kostum tinaru Sabah, orohian oku papaatag kumaa koporintaan mooi silihon ilo’ kod posokoton pinotomod id ababayan kararamaian koporintaan pogun nogi’ ontok tadau-tadau atantu’ i osorou do kosudong.
“Noondo diti, tikid tadau Kaapat, sitaf koporintaan mononsokot posokoton batik,” ka disio ontok minoboros id ramai Sodop Koubasanan Etnik Sabah do hiti.
Nokotindapou sabaagi tombului apantang i Datin Seri Linda Ewit, sawo di Kumoduo Boyoon Montiri II, Datuk Seri Dr. Joachim Gunsalam, i minongobi’ sawo di Boyoon Montiri. Nokotindapou nogi’ i Kumoduo Potunud Koupisan Haal Koonduan Pogun Sabah (JHEWA), Noorfaridah Haji Othman om Timbang Presiden PPS, Annie Louders.
Azizah pinoposotol nogi’ koponsolon inggisaman po’ompus montok monimporon nogi’ papagaras koubasanan, boros om adat tinaru id Sabah mooi do amu’ koindisan id kinoinwoguan om kinoburuon tiknologi.
“Sabah pasanganu mogigiyon di opuawang kopio di kopogisusuaian koubasanan, kapaampai mantad 35 tinaru agayo om 217 sub-tinaru, nogi’ momoguno lobi 50 boros om kiikiro 90 dialek.
“Kopogisusuaian diti kiguno pususon mooi do otungkusan sukod wagu do timpu dumontol,” ka disio.
Nunsub nogi’ disio tongo’ koisaan tinaru do papatantu’ sukod wagu kaanu moboros id boros sandad sompoopori.
“Nung boros om tungkusan koubasanan amu’ ogompi’, kointutunan toisoiso’ tinaru atagak. Nung kointutunan atagak, nunu podii i aanu tokou do ondoson montok sinakagon dumontol,” ka disio.
Azizah pinoposotol do mogigiyon Sabah kiguno oondos popokito kinolumison boros om koubasanan diolo mooi do lobi ointutunan id nayatan nasional om sompomogunan.
“Kointutunan koubasanan tokou nga’ inggarasan maya’ tuunion om loyou koubasanan miagal Kadazan, Dusun, Bajau om Murut i kiharo tuni kakamot tuunion nogi’ loyuk poinpoopori di olumis om koimbayat.
“Nuru’ tokou do sorohon do mantad no kaadangon om pisompuruan sosonginan pomogunon kaanu mumang buru’ kumaa toguang nogi’ pantangon id nayatan sompomogunan.
“Pinuawang koubasanan nga’ tataba’ nogi’ do pogun i kigatang kopio om kiguno gompion, okon nopo ko’ montok potungkusan nga nogi’ sabaagi intodonon ikonomi maya’ pomorunan ponombuluyan, seni kreatif, nogi’ pomorunan okoro’ om gonsuhatan mimpau mogigiyon id Sabah,” ka disio.
Kiginumu’ 32 tulun nakaampai id Ababayan Pingludaan Sayau Koubasanan Tinaru Sabah i pinoindalan pogulu diti, kaampai duo momoluda’ om 30 tutumanud mantad Biro Koubasanan PPS om Briged Muda PPS.
Ababayan diti kihontolon montok manahak kopoilaan om pingludaan id mogisusuai ponit sayau koubasanan tinaru Sabah.
