Ewon Benedick
KOTA KINABALU: Komontirian Koburuon Mongindapu’ om Koperasi (KUSKOP) tumopot papalantoi tingkananon pomoruhang i kosudong di kogugunaon mongindapu’ om koperasi id Sabah om Sarawak id siriba’ Koporintaan Madani.
Montiri dilo’, Datuk Ewon Benedick minoboros, wookon tingkananon pomoruhang KUSKOP nopo nga’ Projik Premis Tamu Desa, Skim Koponguhupan Mongindapu’ Tomu (SPUT), Pongusin Mongindapu’ Mamasok Sabah om Sarawak (BEEP Plus), Skim Ponguhupan Pomorunan Kraf om Ponguhupan Kopoburuan Koperasi Ponombuluyan (JEJAK Koperasi).
Minoboros isio, KUSKOP nga’ mamalan nogi’ montok monuridong Hub SME id Sabah om Sarawak nogi’ ababayan kapaadasan gatang babarang maya’ tinimungan koperasi.
“Komontirian om tongo’ kotinanan tumilombus papagaras naangayan surupukaraja’ kumaa tongo’ moomoguno id pototongkod pomogunon suai ko’ popoburu’ tongo’ tingkananon pomoruhang i kopisudong id Sabah om Sarawak.
“Luguan Montiri (Datuk Seri Anwar Ibrahim) minanahak kosiwatan montok papalantoi sondikoton komontirian kopiongoi di gagasan Malaysia Madani,” ka disio.
Minoboros isio dilo’ ontok pinapatahak boboroson Ababayan Ministerial Talk “Polisi Pandang Ke Timur: Perspektif KUSKOP” id Auditorium Kompleks Pentadbiran Koporintaan Pisompuruan Sabah.
Ewon pinopoilang nogi’ do sondikoton disio sabaagi Montiri KUSKOP.
“Miampai amu’ momidsala’ tingkananon di haro mantad do komontirian id pototongkop pomogunon, orohian oku kokito tingkananon pomoruhang aanu patahakon kumaa Malaysia Kosilahon ilo’ nopo nga’ Sabah om Sarawak.
“Koburuon ikonomi solinaid diti osiau id Semenanjung, norikot nodi timpu ‘dasar’ pandang ke Timur id pomogunon do turidongon montok popoburu’ miampai lobi kaparagat kosiwatan ikonomi Sabah om Sarawak kopiongoi di kinosorokon ikonomi pogun sombol,” ka disio.
Mantad no dilo’ ka disio, katatapan pandang ke Timur aanu mimpuun mantad KUSKOP.
Minoboros isio, katatapan pandang ke Timur okon ko’ popointutun nopo di tongo’ skim koponguhupan kousinan wagu kumaa mongindapu’ id Sabah om Sarawak nga nogi’ mogowit lobi kogumu’ ababayan komontirian.
“Wookon ababayan KUSKOP i pinoindalan id Sabah om Sarawak di toun nakatalib om toun diti kaampai no pinamaramaian Tadau Koperasi om Wulan Koperasi Kabansaan, Tadau Madaadagang om Mongingapu’ Okoro’ Nayatan Kabansaan i kumoinsan nogi’ pohoroo’ id Sabah om tongo’ karnival ngaawi’ mongindapu’ pinaanjur tongo’ agensi KUSKOP.
“Pinaparalad tokou nogi’ do surupukaraja’ tongo’ kotinanan komontirian id Sabah om Sarawak maya’ kinopongukaban Upis Institut Keusahawanan Negara (INSKEN) id Kota Kinabalu om Sarawak, pinongukaban raan Upis Tekun Nasional, Suruhanjaya Koperasi Malaysia (SKM) om Institut Koperasi Malaysia (IKMA), pinongukaban raan wagu Bank Maapanau om kogogonopan ATM wagu Bank Rakyat,” ka disio.
Ka disio, komontirian nga’ pinoposili nogi’ di tongo’ luguan kotinanan KUSKOP id Sabah om Sarawak mantad nayatan pakakaraja’ nokoiyonon.
“Borneonisasi surupukaraja’ koporintaan Pisompuruan id Sabah om Sarawak nopo nga’ iso’ haal poinhompit Pibatosan Malaysia 1963 i masaan salasaion om pibabarasan id koinsanai nayatan poinhompit kaampai Kounsol Tindakan Kopoindalanan Pibatosan Malaysia 1963 (MTPMA63),” ka disio.
Ewon minoboros, montok popoinggirot po do kopoindalanan ngaawi’ tongo’ ababayan mongindapu’ id Sabah om Sarawak, puruankuasa’ ponguhupan koburuon kopongindopuan Sabah om Sarawak om Kounsol Koburuon Mongindapu’ Koperasi, Madaadagang om Mongindapu’ Okoro’ Watas Sabah om Sarawak tinuridong.
