Hajiji (kotolu, wanan) miampai di Ellron om puru kabinet suai ontok kinotombuluyan karaja’ disio kuminaa komontirian doid Wisma Muis.
KOTA KINABALU: Boyoon Montiri, Datuk Seri Haji Hajiji Haji Noor minamarayou do Komontirian Komulakan om Sipoot Pogun mantad nodi tongo’ ababayan kopoburuan komulakan om sipoot di pinoindalan.
“Komontirian Komulakan om Sipoot nopo nga’ komontirian di oponsol tu’ moningkanan do kopoburuan komulakan om sipoot id pogun diti.
“Komulakan nopo nga’ timpu obontol tokou. Mantad dilo’, koburuon komulakan nopo nga’ oponsol kopio,” ka disio ontok kinotombuluyan karaja’ dau doid Komontirian Komulakan om Sipoot (KBS) id Wisma Muis, do hiti di tadau baino’.
Minonusui nogi’ isio kinalantaion Skim Jaya Usahawan Belia Sabah (SYABAS), i nokoposimbuat pipiro tutumanud kuminaa ko’oitan ‘jutawan’.
Monunurat Pointatap Komontirian, Datuk Mansor Asun pinopoilo do gisom noondo, komontirian dilo’ pinopoobi’ RM7 riong montok ababayan dilo’ i nakapanahak koundaran kumaa 5,500 mamaramit id mogisusuai pongindopuan id pototongkop pogun.
“Iti nopo nga’ ababayan di abantug. Poposotol oku kumaa ababayan diti mooi do lobi kogumu’ komulakan i kosudong karamit koundaran mantad dilo’,” ka di Hajiji.
Boyoon Montiri minanangkabayahan nogi’ kumaa kontinjen Sabah id SUKMA tu’ nakaanu 29 midol amas id Sipoot Malaysia 2024 doid Sarawak di tulan nakatalib dilo.
“Sundung amu’ nokoponigampot rikoton 40 amas, pinapatahak tokou di bobos osonong. Mintorining lobi kaparagat montok mamagampot naangayan lobi kosonong timpu dumontol,” ka disio.
Minamarayou nogi’ isio di Eddy Bernard, paralimpian Sabah kuminaa Sipoot Paralimpik Paris, tu’ nakalantoi midol gangsa id pigusaan 100m.
“Id timpu obontol, pokionuon ku komontirian poposindak po do rontob sipoot id Sabah, kaampai monginsonong kompleks sipoot om tongo’ kogoogonopan montok koundaran tongo’ atlet,” ka disio pinoposotol.
Nokotindapou nogi’ Montiri Komulakan om Sipoot, Datuk Ellron Alfred Angin; Montiri Kousinan, Datuk Seri Masidi Manjun; Montiri Koburuon Labus Kakadayan, Datuk Jahid Jahim; Montiri Sains, Tiknologi om Inovasi, Datuk Mohd Arifin Mohd Arif, tongo’ monguhup montiri om upisor totuo KBS.
