Dr. Joachim (tanga’) guminambar pongingitanan miampai oinsanan i nokotindapou id Festival Mongigol Bundu Tuhan 2024, i pinaanjur solinaid tolu tadau minimpuun di tadau Kolimo (6tw Kosiam) id Dewan Siba, Bundu Tuhan, Ranau.
KUNDASANG: Kumoduo Boyoon Montiri II po nogi’ Puru Lintuhun Undangan Pogun (ADUN) Kundasang, Datuk Seri Dr. Joachim Gunsalam pinopohimagon Festival Mongigol Bundu Tuhan 2024 i pinaanjur id Dewan Siba Kampung Bundu Tuhan, do hiti di tadau Kolimo (6tw Kosiam).
Festival dilo’ nakaanjur solinaid tolu tadau.
Dr. Joachim pinopolombus koondosan disio nokokito tongo’ komulakan kampung dilo’ guminompit miampai aparagat id festival i kapabantug koubasanan om kinoubasanan diolo’.
Bundu Tuhan nopo nga’ iso’ kaandasan kumaa Ranau’ tu’ nokopoimbulai ogumu’ graduan id mogisuaian kaganaan miagal dokutur, luyar, injinior om arkiterk mantad podi toun 80an, ka di Montiri Koporintaan Koiyonon om Pomuwalaian dilo’.
Minanangkabayahan nogi’ isio kumaa di Ponorikohon Manganganjur, Adrian Soidi nogi’ soginumu’ 200 puru mogigiyon Bundu Tuhan i pinapalantoi festival dilo’.
Ka di Adrian, wookon kaparagatan i pinapanau solinaid tolu tadau dilo’ nopo nga’ kopointalangan, pinialaan Hiis, pokikitanan sayau Mongigol om pomurutan tikit kinasip.
Dr. Joachim minanangkabayahan nogi’ kumaa Bontugan Hiis mantad Bundu Tuhan i inturu’ no kalantoi id nayatan pogun.
Nokotindapou nogi’ i Luguan Watas, OKK Dominic Ganie; Ponorikohon KDCA Bundu Tuhan, Joaneseh James Ghani; Ponorikohon Puruankuasa’ om Protokol Bundu Tuhan (JKPA), Johnny Ganie; tongo’ molohingon kampung, Puruankuasa’ Koburuon om Koumoligan Kampung (JPKK) om tongo’ suusmikul mantad SK Bundu Tuhan om SMK Bundu Tuhan, Ranau.
