Hajiji (koduo, gibang) nonuan kointalangan karait projik ‘perintis variasi’ parai TR8 di Potunud Karaja’/CEO Tinimungan Sawit Kinabalu, Victor Ationg (gibang).
KOTA MARUDU: Boyoon Montiri, Datuk Seri Haji Hajiji Haji Noor pinahabar do Sabah nokoponigampot sondikoton dau montok momunso komosikinan ‘tegar’ di wulan Koturu’ toun diti.
“Mantad no do tonggungan mantad oinsanan, i kopiongoi di angkab Koporintaan Madani om Palan Koburuon Sondikoton Sabah Maju Jaya 1.0 (2021-2025), orohian oku pahabar nakalantoi yahai minongidu’ tinimungan mosikin tegar id nuludan ‘locked figure’ di ko 31tw Koturu’ 2024,” ka disio.
Minoboros id ababayan kinopoimpuunan projik perintis pananaman parai id Kampung Ongkilan do hiti di tadau baino’, Boyoon Montiri minoboros, sokodung mantad GLC miagal Sawit Kinabalu nokouhup inggisaman koporintaan pogun minongidu’ tinimungan mosikin tegar id pogun diti.
“Kalansanan ku GLC tumilombus poposodia’ kosiwatan pakarajaan kumaa komulakan tokou. Iti tantu’ no do kouhup koporintaan pogun maya’ Sekretariat SMJ om Upis Koburuon Sabah minggisom montok momupus komosikinan tegar,” ka disio.
