Dr. Joachim (poindikau kotolu, gibang) guminambar pongingitanan miampai tombului om susumikul SMK Timbua I nokotindapou id ababayan dilo’.
RANAU: Koporintaan opoduli’ di kobolingkahangan i potoguang do molohing om mitatamong i amu’ songkuro kikosukupan id kapanahakan kogogonopan om kosimbayanan maso-maso monugat toilaan id sikul, ka di Kumoduo Boyoon Montiri II, Datuk Seri Dr. Joachim Gunsalam.
Ka disio, koyuon diti opurimanan kopio di molohing om mitatamong ontok timpu kotimpuunon kosikulan lobi-lobi no paganakan i kiharo tanak di ogumu’.
“Koporintaan nga’ pointopot nogi’ kopio di koburuon balajaran id pogun diti miampai minanahak tongo’ ponguhupan balajaran mintonod nayatan sikul osiriba’ gisom id nayatan univositi. Iti nopo nga’ mantad no, koilo koporintaan songkuro kinoponsolon do balajaran kumaa koburuon sosonginan pomogunon,” ka disio ontok pinopohimagon Ramai Kinapatahakan Skim Ponguhupan Pinotomod (SBK) Tinimungan Yayasan Sabah montok toun 2024 id SMK Timbua, do hiti, di tadau baino’.
Dr. Joachim po nogi’ Montiri Koporintaan Koiyonon om Pomuwalaian minoboros, rontob balajaran di lobi kasawat kapanahak waya’ kumaa koburuon pomogunon sabab, tulun di kiharo pomusarahan akawas kopongingkawas okon nopo ko’ siktor ikonomi nga nogi’ siktor suai miagal kopoindalanan, kolidasan om koumoligan pomogunon id suang timpu di anaru.
Balajaran nga’ kopongingkawas nogi’ do kabaalon intodonon ginoris tulun miampai poposodia’ toilaan om komilaan di gunoon montok monokitopong okon nopo ko’ id pidagangan pogun nga id pidagangan sompomogunan, ka disio i minoboros, sinakagon diti no i kopongulud timpu dumontol pomogunon potilombus dino popoburu’ Sabah.
“Otumbayaan oku nogi’, balajaran nopo nga’ iso’ komponen oponsol id koponimbanan ikonomi sosonginan paganakan. Koburuon id balajaran sosongulun kapanahak waya’ kumaa koinsawaton kosiwatan montok maganu pakarajaan di lobi kosonong.
“Soira’ kaanu karaja’ di lobi kosonong, iti kopongingkuri’ komosikinan id paganakan nogi’ kopongingkawas kuasa’ boli id koposion sangangadau. Kohondot dilo’, tongo’ susumikul i nokotindapou do tadau diti kiguno kiharo sondikoton om angkab montok lumabus mantad koinggoritan paganakan miampai minggisom id pinsingilaan doid sikul.
“Orohian oku nogi’ poposorou tangaanak mooi do rumikot kou mooi sikul nogi’ moningkanan poinponu’ kumaa pinsingilaan.
‘Gunoon koinsanai kosiwatan di haro montok tumilombus minsingilo om poposili sikul sabaagi koiyonon mangasa’ bakat om momonsoi nawawaya’an miampai poinbobos sinonong gisom kalantoi sumili tulun di kinaangayan.
“Balajaran nopo nga’ iso’ kakamot bobos kiwaya’ montok lumabus mantad komosikinan.
“Minggisom sumili di bobos osonong sabab id pomogunan di kipogiinsolodan babaino’ diti i no bobos osonong i kalantoi. Otumbayaan oku oinsanan susumikul kaanu sumili tulun di kikaabalon, kaanu monokitopong id pomogunan, potilombus dino kosili mogigiyon di abantug id koposion om pikikiro insan timpu obontol kosili songulun lansanon di pantangon,” ka di ADUN Kundasang dilo.
Dr. Joachim (koduo, gibang) pinapatahak Skim Ponguhupan Pinotomod kapaampai set buuk rujukan SPM om kalkulator saintifik kuminaa songulun susumikul SMK Timbua.
Dr. Joachim po nogi’ mamaramit ponguhupan Sikulasip Yayasan Sabah minonongkounsikou kumaa Tinimungan Yayasan Sabah tu’ pinopotoluod babarang kogugunaan kapaampai set buuk ‘rujukan’ SPM om nogi’ ‘kalkulator saintifik’ kuminaa 50 susumikul amu’ songkuro kikosukupan sikul dilo’.
Otumbayaan ponguhupan diti kapanahak koundaran kumaa tongo’ susumikul i kosudong mamaramit dilo’, kalansanan disio ponguhupan mantad Tinimungan Yayasan Sabah diti kosili pongunsub kalantaion susumikul id kaganaan akademik.
SBK diti kituduan monguhup mongingkuri’ tonggungan paganakan susumikul di mosikin, paganakan B40 nogi’ molohing mamaramit ponguhupan e-Kasih maya’ kapanahakan ponguhupan sokodung pinsingilaan.
Ka disio, Yayasan Sabah pinopouyu sikulasip montok susumikul tingkatan 6, nayatan Diploma, Ijazah Sarjana muda om Sarjana nogi’ sikulasip Dermasiswa montok nopo do susumikul UiTM.
Koporintaan pinopouyu po nogi’ Sikulasip Koporintaan Pogun, Sikulasip Gaa’ Tuan Yang Terutama Molohingon Pogun Sabah (TYT) om Sikulasip Cemerlang Koporintaan Pogun Sabah (BKNS).
“Id siriba’ Koporintaan Gabungan Rakyat Sabah (GRS), haro nogi’ tongo’ ponguhupan suai miagal Ponguhupan Pinotomod Tunui Poporisaan (BAKTI), Ponguhupan Ihsan Komputer Sabah (BAIK) – 1 Komputer 1 walai; Ponguhupan Kaparagatan Mongingia’ om Molohing (BAGUS),” ka di Dr. Joachim.
Nokotindapou nogi’ sawo di Dr. Joachim, Datin Seri Linda Ewit; Luguan Pentadbir Zon Tisan Kotonobon Koibutan, Yayasan Sabah, Linda Anthony; Molohingon Sikul SMK Timbua; Dr. Marcus Shapie; Lansanon Koburuon Mogigiyon, Dounis Sani om tongo’ mongingira’ sikul.
