Julita (kolimo, gibang) guminambar pongingitanan miampai puru PBS Bohogian N.42 Melalap i nokotindapou id Mitingan Agayo Toun-toun ko-39 id Longkod Koubasanan Murut, Pulong, Tenom.
TENOM: Parti Bersatu Sabah (PBS) otumbayaan timpohon Lintuhun Undangan Pogun (DUN) Melalap i po nogi’ timpohon notungkusan parti alantoi kawagu id Pomilian Agayo Pogun (PRN) do obontol miampai sokodung osonong id Bersatu-Solidariti (BEST) pialatan PBS om Parti Solidariti Tanah Airku (STARSABAH).
Monurat Agayo PBS, Datuk Julita Majungki minoboros, timpohon DUN Melalap kiguno lantaion kawagu montok sumili somboogian mantad rolou koporintaan id DUN Sabah.
“Kalantaion diti oponsol mooi do Sabah kosigampot kaadangon pulitik di lobi kosonong montok kotilombuson pomorintaan pogun di po’ompus om moningkanan.
“Otumbayaan oku timpohon diti aanu lumantoi maya’ pisokodungan osonong id BEST om tongo’ koombolutan komponen id Gabungan Rakyat Sabah (GRS) i mogiuhup posindak sunduan mongungundi’ id kinoiyonon poonsokid.
“STARSABAH om Parti Gagasan Rakyat Sabah (Gagasan Rakyat) sopipoopori mongobi’ DUN dodoros miamapi Melalap.
“Hal do calun maan pogibabarasai katalib po do opongo pirundingan,” ka disio katalib pinopoimagon Mitingan Agayo Toun-toun (AGM) ko-39 PBS Bohogian N.42 Melalap id Longkod Koubasanan Murut, Pulong, do hiti di tadau Koonom katatalib (13tw Koturu’).
Julita minoboros, PBS kiharo raan aparagat id 76 mantad koinsanai 99 kampung doid DUN Melalap om pipiro raan wagu maan ukabai nosusuhut kinosuangan ogumu’ puru wagu kuminaa parti.
Ontok AGM dilo’, PBS Bohogian Melalap minamaramit soginumu’ 1,135 upalai kosompuruan kaampai pinongukaban soginumu’ siam (9) raan wagu.
Nokopogulu id boboroson disio, i Julita po nogi’ Monguhup Montiri Kousinan Sabah minokianu koinsanai puru parti do tumilombus momuginawo om mamagatang pinoburu’ PBS i po nogi’ songinan parti nokoiyonon di kiharo sinusuyan kinopoburuan poinpoopori id kinopogowitan kinotungagan mogigiyon Sabah montok monugat om mongumolig kopotutan ngaawi’ pogun.
“PBS no i pinapatanom bibit sunduan kopongupusan kumaa pogun Sabah nogi’ minonimpuun inggisaman koponugatan kumaa tongo’ kopotutan pogun,” ka disio.
Pinokianu nogi’ disio yolo’ do mamantang om mamagatang kopomuruanan parti di poinggonsuhatan (moderate), kitonggungan, otiu’ om otulid poburu’.
“Aiso’ po lansanon parti i noowit kuminaa kopongodilan mantad no do sala’ pogoyuon kopomusalaan, kopokito do tongo’ lansanon parti kitonggungan, otiu’ om otulid id kopoburuan,” ka disio.
Julita mokianu nogi’ inggisaman monuduk lansanon omulok ingkawasan montok monilombus kopomuruanan om kopoburuan pulitik di osonong mantad tongo’ moninimpuun miagal di Tan Sri Joseph Pairin Kitingan om tongo’ lalansanon nongkopogulu.
