Saiful Lizan Ibrahim (kaapat, wanan) id Ababayan Kembara Sahabat Maritim doid SK Terusan Baru, Pulou Timbang id Sandakan, Sabah di konihab.
SANDAKAN: Soginumu’ 37 kes pinomogokoman i kopohompit kinapagahawan kikiro RM1.2 riong nokosurat do Kotinanan Pogirotkuasa’an Maritim Malaysia Zon Sandakan po’ompus timpu onom wulan kumilompuunon toun diti.
Tumanud Utusan Malaysia, Ponowoli Luguan Potunud Maritim, Laksamana Madya Maritim Datuk Saiful Lizan Ibrahim minoboros, ginumu’ pinomogokoman dilo’ somok miirad di ginumu’ kes pinomogokoman di 2022, ilo’ nopo soginumu’ 47 kes miampai gatang naahou lobi RM86,000.
Di toun nakatalib, soginumu’ 42 kes pinomogokoman nokosurat id Sandakan miampai gatang naahou katalib RM270,000.
“Kes pinomogokoman diti kopokito do Maritim Malaysia, kosuul no Zon Maritim Sandakan, pointootopot id koponoibahan kaparagatan kopomusalaan om sala’ wonsoi id rahat lolobi no id kowoigan Sandakan,” ka disio katalib Ramai Kinopohimaganan Ababayan Kembara Sahabar Maritim 2024 id Sikul Kabansaan (SK) Terusan Baru, Pulou Timbang, do hiti di konihab.
Ka di Saiful, kinalantaion pinomogokoman dilo’ nouhupan nogi’ di kointalangan pinatahak do tulun ginumuan, kosuul no mogigiyon maritim miagal monginsada’ i koilo do kogugurao’ nogi’ kaparagatan i naantakan id kowoigan pomogunon.
Kohondot dilo’, kalansanan disio mogigiyon maritim tumilombus sumili ‘mato om tolingo’ kumaa Maritim Malaysia mooi do kaparagatan sala’ wonsoi om kopomusalaan rahat aanu manalob.
Kalansanan nogi’ disio ababayan miampai mogigiyon miagal Sahabar Maritim aanu popoindalan miampai pointantu’ timpu mooi do pisokodungan om pihunungan id pialatan Maritim om mogigiyon maritim oinggirotan po.
