Dr. Joachim (tanga’) minongobi’ di Boyoon Montiri pinopoindalan gimik kopoimaganan Sumungkad Linimput Pasar Rakyat Duo Tingkat Kakadayan Beluran.
BELURAN: Koporintaan maya’ Unit Mamalan Ikonomi Pogun (UPEN) pinopolulus ponuridongan linimput Pasar Rakyat Duo Tingkat id Kakadayan Beluran miampai kos kousinan soginumu’ RM2.5 riong id siriba’ Palan Malaysia Ko-12 (RMK12).
Boyoon Montiri, Datuk Seri Haji Hajiji Haji Noor pinopoimagon ababayan sumungkad projik dilo’ do hiti di tadau baino’.
Soira’ do opongo, linimput Pasar Rakyat diti i oinggonopan do tongo’ kogogonopan pikikiro kouhup 70 tulun mongingindapu’ nokoiyonon om kapanahak kosimbayanan kumaa mogigiyon Beluran di rumikot.
Linimput po nogi’ diti nga’ kopoiyon kogogonopan suai miagal surau om pagagawasan i pikikiro opongo wulan Kolimo toun tiso’.
Dr. Joachim (kaapat, wanan) minamaramit tandamato mantad di Roger.
Boyoon Montiri lumansan kopoburuan projik diti aanu momongo tumanud timpu di pinatantu’.
“Iti nopo wookon inggisaman koporintaan montok popomogot rontob koposion nogi’ mongingkawas rontob sosioikonomi mogigiyon id watas diti.
“Unsubon ku nogi’ koinsanai momuruan koupisan om lansanon mogigiyon Beluran do papatantu’ koinsanai projik koburuon di napalan om pinoindlaan id watas diti aanu popoindalan miampai poinsonong mooi kapanahak koundaran id sunduk koingkawason ikonomi kumaa mogigiyon Beluran.
“Iti montok papatantu’ prinsip ‘Value for Money’ ilo’ nopo nga’ koinsanai kos pabalanjaan nopo nga’ montok no do koponsolon om kasasanangan mogigiyon nokoiyonon,” ka di Hajiji. Boboroson disio binasa’ di Kumoduo Boyoon Montiri II po nogi’ Montiri Koporintaan Koiyonon om Pomuwalaian, Datuk Seri Dr. Joachim Gunsalam.
Dr. Joachim (kaapat, wanan) pinapatahak ponokokunci’ kumaa mamaramit Walai Mesra Sabah Maju Jaya (SMJ) id Ababayan Kopoimaganan Sumungkad Linimput Pasar Rakyat Duo Tingkat Kakadayan Beluran.
Boyoon Montiri minoboros, kopiongoi di Palan Koburuon Sondikoton Sabah Maju Jaya (SMJ), koporintaan pointopot id koponginsonongan nogi’ mongingkawas rontob sosioikonomi om kasasanangan mogigiyon pogun diti.
“Ababayan do tadau diti nopo kokitanan atalang tonggungan koporintaan id kopotontuan hontolon Sondikoton Sabah Maju Jaya osigampot miampai poposodia’ kogogonopan pongindopuan di oulud om osimbayan kumaa mongingindapu’ Mamasok id mogisusuai watas do koonuan ikonomi mogigiyon nokoiyonon.
“Pasar di haro mantad id Kakadayan Beluran nopo nga’ iso’ lot gerai poingukab i kitaap miampai nokopo’iyon kikiro 51 mongingindapu’, i tinuridong di toun 2002.
“Poingkuro po, pinoilo oku do amu’ nodii ilo’ kosudong do gunoon sabab nakalaid, suai ko’ momoguno kogogonopan pongindopuan di lobi kagayo, oulud om osimbayan montok popoiyonon tongo’ mongingindapu’ di mumu’-gumu’,” ka di Hajiji.
Pinokianu nogi’ disio oinsanan lansanon om mogigiyon watas Beluran do toririmo manahak sokodung kumaa katatapan om nogi’ ababayan i poindalanon koporintaan.
“Otopot nopo, koinsanai katatapan i tinuridong om ababayan di pinalana montok no do koponsolon, kasasanangan om koburuon Sabah di koupusan diti,” ka disio.
Nokotindapou nogi’, Monguhup Montiri Koburuon Labus Kakadayan po nogi’ Puru Lintuhun Koundangan Pogun (ADUN) Labuk, Datuk Samad Jamri; Monguhup Montiri Pomutanaman, Ponginsadaan om Pomorunan Akanon om ADUN Tandek, Datuk Hendrus Anding; Monunurat Pulitik kumaa Kumoduo Boyoon Montiri Sabah om ADUN Telupid, Datuk Jonnybone Kurum; ADUN Sinili, Datuk Jaffari Walliam; Monunurat Pointatap Komontirian Koporintaan Koiyonon om Pomuwalaian Sabah, Datuk Dr. Jamili Nais om Upisor Watas Beluran, Roger Appolonius.
