Hajiji (koonom, wanan) miampai tongo’ mononoluod minomutul ribon katalib kinopoimaganan linimput mogisuaiguno Eng Ket Thong id SJK(C) Chen Shin Tuaran di tadau Koonom. Okito po nogi’ i Montiri Ponombuluyan, Koubasanan om Sandad Posorili’ Datuk Christina Liew (kolimo, wanan) om i ADUN Pantai Dalit Datuk Jasnih Daya (kaapat, wanan).
TUARAN: Koporintaan Pogun manahak tonggungan poinponu’ id kopoingkawasan koburuon balajaran doid pogun diti, ka di Boyoon Montiri, Datuk Seri Haji Hajiji Haji Noor.
Ka disio, balajaran nosili posuulon tu’ oponsol ilo’ id kopongimbulaian mogigiyon i kitoilaan om kikoilaan i koposiau koburuon nogi’ komogoton pogun.
“Koporintaan Pogun manahak koposotolan kopio kumaa koburuon balajaran montok papatantu’ mogigiyon pogun diti kotilombus kaanu balajaran di bobos osonong om ogonop.
“Nung mogigiyon haro balajaran om mogisusuai komilaan, iti kouhup dati’ popoburu’ pogun diti.
“Iti nga’ kopiongoi nogi’ di iso’ mantad hontolon id Palan Koburuon Sondikoton Sabah Maju Jaya (SMJ) ilo’ nopo nga’ “Modal Insan dan Kesejahteraan Rakyat” kotilombus poinggompi’ lolobi no id tonggungan koporintaan montok mongimbulai modal insan di kikabaahan, kikabaalon om kiginoris monokitopong.
“Koporintaan Pogun nga’ tumilombus papatantu’ koburuon kogogonopan om piromutan balajaran osimbayan aanu popoindalan maya’ pogisokodungan ouli’ mogisuai boogian i orohian popouhup kumaa kopongingkawasan naangayan balajaran pogun diti,” ka disio ontok pinopoimagon Linimput Mogisuaiguno Wagu Sikul Ponit Kabansaan Cina (SJKC) Chen Sin Tuaran doid sikul dilo’ do hiti di tadau baino’.
Ka di Hajiji, Koporintaan Pogun amu’ papaada’ koponsolon koinsanai mogigiyon amu’ momuntuk tinaru om ugama’, kamapai no id balajaran.
“Amu’ mimud sikul Sina’ toi kabansaan, Koporintaan Pogun tumilombus monguhup montok papatantu’ tangaanak tokou kaanu balajaran di ogonop. Om nogi’, mogisusuai inggisaman Koporintaan Pogun pinosodia’ montok papatantu’ tangaanak kaanu balajaran di ogonop miagal sikulasip om kapangalasan suai ko’ ponguhupan ‘one-off’ kumaa susumikul i karamit kopouyuhan kumaa kotinanan balajaran akawas.
“Koporintaan Pogun nga’ minonuridong nogi’ do Tabung Balajaran Pogun Sabah montok monguhup susumikul i amu’ kaanu ponguhupan sikulasip. Otopot nopo ogumu’ inggisaman i pinosodia’ koporintaan montok monguhup mogigiyon id pogun diti,” ka disio.
Daamot dilo’, minoboros i Hajiji, Koporintaan Pogun nga’ moningkanan nogi’ montok popoburu’ TVET id pogun diti om potongkopon ilo’ kumaa poliliput pogun.
“Tangaanak tokou nuru’ onuan komilaan id kaganaan tiknologi mooi do kaanu kosiwatan di miagal di tangaanak suai id pomogunon diti,” ka disio.
Karait do ababayan dilo’, minoboros isio, linimput mogisuaiguno wagu SJKC Chen Sin dilo’ kapanahak kosimbayanan om kasasanangan kogogonopan balajaran kumaa susumikul ngaawi’ id sikul dilo’.
“Tadau diti ounsikou tokou tu’ nokokito kinalantaion pinonuridongan linimput mogisuaiguno wagu sikul diti. Om nogi’, Koporintaan Pogun pinopoobi’ soginumu’ RM2 riong montok pinonuridongan diti tu’ koilo oku do koponsolon balajaran. Amu’ oku momuntuk sikul ponit nunu, amu’ mimud tinaru om ugama’, nung montok poposindak balajaran, uhupan ku.
“Linimput diti nga kokitanan nogi’ do asil pisokodungan ouli’ mantad oinsanan bohogian montok papatantu’ kogogonopan balajaran di osimbayanan kosuul no kumaa susumikul diti aanu poposodia’,” ka disio.
Linimput mogisuaiguno wagu apat tingkat miampai kos RM4.2 riong dilo’ nopongo di wulan Kowalu’ 2023 nakatalib. Noinggonopan do mogisusuai kogogonopan pinsingilaan kumaa susumikul miagal pisuk tuunion, ‘reka bentuk’ om tiknologi (RTB), multimedia, sains om longkod pambasaan buuk.
