Hajiji pinapatahak tandamato kuminaa di Sultan Ahmed Sulayem.
KOTA KINABALU: Boyoon Montiri, Datuk Seri Haji Hajiji Haji Noor otumbayaan pisokodungan kosudong pialatan Sabah Ports Sdn. Bhd. (SPSB) om DP World (DPW), popopoindalan terminal dodopiton pomogunan kosili iso’ barakat kumaa angkab Sabah montok popointutun Dodopiton Kontena Suok Sapangar (SBCP) sabaagi ‘hab transhipment’ (longkod koumbayaon om kapaatadan) agayo id ponongkoiyonon diti.
“Id timpu anaru visi dilo’ nopo nga’ montok monginsonong kopogiromutan tinan om tisan rahat id pototongkop pogun potilombus dino koponginsiriba’ kos om timpu ‘transit’ (koumbaya’on) suai ko’ monginsonong sitandod naangayan padarapas koinsanai piromutan pangaba’ pogun,” ka disio.
“Ounsikou oku DP World minomili’ Sabah monotk popoinggayo pongindopuan dau om alapon ku DP World montok mintong kaganaan ikonomi kikosiwatan suai id Sabah,” ka di Hajiji onotk pinirubaan miampai Ponorikohon om Luguan Upisor Eksekutif Tinimungan DPW i poinlongkod id Dubai, Sultan Ahmed Sulayem id labus pitimungan Lintuhun Undangan Pogun (DUN) Sabah, do hiti, di tadau baino’.
Daamot dilo’, i Sulayem minoboros, DP World nokopiboros montok popiromut pisokodungan pongindopuan miampai SPSB.
Sulayem, i nokoulud sabaagi lansanon pongindopuan Arab ko-11 bobos kikuasa’ di 2023, minamarayou di Hajiji tu’ pinopoindalan projik diti.
“Sabah nopo nga’ songinan pogun di olumis om poinsumpak miampai kosudong montok kosili hab ‘lojistik’ id koiyonon diti,” ka disio i minoboros DP World minomili’ Sabah mantad no do kaadangon dilo’, i osimbayan montok kopoopuan.
Sulayem minoboros, popowonsoi isio di bobos osonong montok momoguno piromutan dau id Fortune 500 montok mogowit pongindopuan kumaa Sabah.
SPSB, tanak komponi pasanganu poinponu’ Suria Capital Holdings Berhad hinombo do Koporintaan Pogun nopo nga’ mongingigit saham agayo, popoindalan walu terminal — SBCP, Terminal Tumau Suok Sapangar, Dodopiton Kota Kinabalu, Dodopiton Kudat, Dodopiton Sandakan, Dodopiton Tawau, Dodopiton Lahad Datu om Dodopiton Kunak’.
Koporintaan Pogun minanahak kopolulusan pisokodungan miampai DPW montok kopoindalanan om ponguludan SBCP di ko 4tw Koiso’ 2023.
DP World pasanganu piromutan lobi mantad 60 port om terminal miampai ginoris montok popoindalan lobi 90 riong Twenty Foot Equivalent Units (TEUs) sontoun om id pototongkop pomogunan.
