Dr. Joachim (tanga’) pinopokito tanda’ ‘osonong’ om guminambar pongingitanan miampai koinsanai i nokotindapou id kinopohimaganan jambatan gantung wagu dilo’.
RANAU: Kumoduo Boyoon Montiri po nogi’ Puru Lintuhun Undangan Pogun (ADUN) Kundasang, Datuk Seri Dr. Joachim Gunsalam pinopohimagon jambatan gantung wagu kininaru 90 meter posoborong Baang Mokodou doid Kampung Takutan, do hiti, di tadau baino’.
Ontok rinubaan media, minoboros isio, jambatan gantung wagu diti i nopongo di wulan Kohopod toun nakatalib om noondo, mogigiyon kampung kopomoguno nodii dilo’ kaampai montok kaparagatan pomutanaman.
“Jambatang gantung diti noputut di toun 2022 gama-gama’ liyud agayo i naantakan di ontok dilo’ nokoowit di mogigiyon kampung amu’ kaanu do momoguno dilo’,” ka disio.
Nokotindapou nogi’ id ramai kinopohimaganan dilo’ i Monunurat Pulitik kumaa di Dr. Joachim, i Yubidi Gumpoyo; Lansanon Koburuon Mogigiyon (PPM), Dounis Sani; Molohingon Kampung, Erin Laug; Ponorikohon JKKK, Parvine Yudin om sitaf Unit Lansanon Kobuuron Mogigiyon (UPPM) DUN Kindasang.
Miampai koinsanai dilo’, haro duo jambatan gantung wagu wonsoiyo’ om duo kawagu i ninsonongan nopongo no do poinponu’.
Nokopogulu, i Dr. Joachim tuminindapou mitingan Raan Parti Bersatu Sabah (PBS) Kampung Takutan i notindapou di 61 puru parti om mio’ontong mitingan.
Minanangkabahayan isio kumaa tongo’ puru PBS raan dilo’ i nakaanu pinapaharo mitingan.
