Hajiji minonorikohon mitingan MTPNg di tadau baino’.
KOTA KINABALU: Boyoon Montiri, Datuk Seri Haji Hajiji Haji Noor mokianu koinsanai kotinanan pogun om Pisompuruan misokodung ogirot montok papatantu’ koinsanai projik koburuon kigatang RM6.6 bilion i pinolulus id siriba’ Roling Plan 4 (RP4), Palan Malaysia Ko–12 (RMK12) koindalan do toun diti.
“Montok toun 2024, Sabah karamit kopoobian koburuon soginumu’ RM6.6 bilion montok popoindalan mogisusuai kaparagatan kaampai no koburuon premis (Tamu Desa), kopongundaran, pomorisian om pongusapan Baang Tuaran, projik panapad liyud, ponuridongan sikul wagu, popoburu’ om monginsonong sikul nakalaid nogi’ koponuridongan kolinik kolidasan wagu.
“Oponsol do haro piuhupan id pialatan kotinanan koporintaan pogun om Pisompuruan montok papatantu’ kopoindalanan osikap koinsanai projik diti montok koundaran mogigiyon,” ka disio ontok minonorikohon mitingan Kounsol Tindakan Koburuon Pogun (MTPNg) id Menara Kinabalu, do hiti, di tadau baino’.
Minoboros isio, oinsanan mositi’ kiharo kogunaan toi inggisaman di akawas om kumaraja’ osikap montok manalasai kobolingkahangan miamapi sunduan poinpuli Malaysia Madani om Sabah Maju Jaya montok manahak surupukaraja’ bobos osonong kumaa mogigiyon om koburuon Sabah.
Minoboros isio, karalano’ kapatahakan surupukaraja’ di laid amu nodii oguno montok kopoindalanan kiwaya’ tikid poburuon koporintaan.
“Sabalik dilo, kiguno tokou monginsonong sistem kapatahakan montok monginsikap kopolulusan id tikid koupisan. Suai dilo’, kotinanan koporintaan mositi’ momoguno poinponu’ kaparagaton tiknologi kaampai pendigitalan id koposindakan kapatahakan surupukaraja’ koporintaan,” ka disio.
Hajiji minoboros, iti nga’ oponsol montok papatantu’ koporintaan kosili popoinsanang kumaa oinsanan bohogian, lolobi siktor swasta i nosili posikap ikonomi pomogunon.
Boyoon Montiri minomohulit nogi’ pongunsuban mooi oinsanan mobi’ rayat om momuruan koupisan mindahu’ mooi do tongo’ kobolingkahangan i kopohimpogong mogigiyon aanu manalasai miampai osikap.
Minoboros isio gisom tulan Koiso’ 2024, pogun Sabah nakabalanja’ soginum’ RM4.9 bilion toi 97.01 pihatus mantad kinopoobian id siriba’ RP3 RMK12.
Hajiji minongunsub mooi koinsanai komontirian, koupisan om kotinanan popoindalan maganu laang aparagat id kopotontuan naangayan RP4 RMK12 kopingoi di naangayan nasional.
Mononorisid ikonomi minongundadait 2023 sabaagi toun kinosimbanon ikonomi pomogunon om 2024 nopo toun kopoindalanan montok koinsanai katatapan i napalan, ka disio i minoboros ikonomi pikikiro otimbang sundung pia potoguang pidagangan pomogunan di amu’ atantu’.
“Koporintaan tumilombus id inggisaman koponginwoguan ikonomi dau montok mongimbayat kopoopuan kigatang akawas inggisaman posunduran id siriba’ palan ikonomi Madani, Palan Sondikoton Kosimbanon Tenaga Nasional (NETR) om Palan Induk Pomorunan Wagu 2030 (NIMP).
“Wookon siktor i kaanu koundaran mantad karalano’ diti nopo siktor ponuridongan sabab koporintaan pinopoobi’ RM72.3 bilion montok padsakaian, waig om ginoris,” ka disio.
Nokotindapou nogi’ Montiri Pidagangan Suang Pogun om Kos Kosukupan Masi, Datuk Armizan Mohd. Ali; Kumoduo Boyoon Montiri, Datuk Seri Dr. Joachim Gunsalam; Monunurat Koporintaan Pogun, Datuk Seri Sr. Safar Untong om Monunurat Pisompuruan Sabah, Datuk Makhzan Mahyuddin.
