Dr. Joahcim (kotolu, wanan), Yiew (wanan), Julita (koduo, wanan), Dr Maximus (tanga’), Jahid (koduo, gibang), Dr Yee (kotolu, gibang) om Datin Seri Vicky id gambar otitimung ontok ramai makan totuong Toun Wagu Sina PBS id Lintuhun Hakka, di songkosodop.
KOTA KINABALU: Kumoduo Boyoon Montiri II, Datuk Seri Dr. Joachim Gunsalam minokinau oinsanan kosuul no sukod wagu sabah do misompuru om ogirot doid inggisaman monugat kawagu kopotutan Sabah.
Kumoduo Presiden Parti Bersatu Sabah (PBS) dilo’ minoboros, mositi’ diolo’ katama’ poposotol kopotutan diolo’ sabaagi mogigiyon Sabah id Malaysia.
“Oondos yahai pasanganu pipiro lansanon omulok Sabah miagal ponorikohon manganganjur, Yee Tsai Yiew i okon nopo ko’ oondos nosili puru PBS nga’ nogi’ katama’ lumabus om popolombus nunu i pokionuan dahai sabaagi mogigiyon Sabah.
“Unsubon ku oinsanan lolobi no sukod wagu Sabah do misompuru om monilombus inggisaman montok maganu kawagu kopotutan pogun om mogigiyon Sabah,” ka diiso id ramai makan totuong Toun Wagu Sina PBS id Lintuhun Hakka do hiti di songkosodop.
Dr. Joachim minoboros, PBS i mamaramit kinouliton toun ko-39 do ko 5tw Kotolu, tumilombus tumopot doid inggisaman montok maganu kawagu tongo’ kopotutan Sabah miagal di poinsurat id Pibatosan Malaysia 1963 (MA63), Koundangan Malaysia, Ruputan Puruankuasa’ Pialatan Koporintaan om sopiagal dilo’.
“PBS nokopoburu’ om tumilombus popoburu’ mooi do oinsanan mogigiyon Sabah kaanu koiyonon di poinpatut id Malaysia, mooi do tongo’ kopotutan Sabah miagal di poinsuang id MA63pokionongohon om pogulion.
“Inggisaman diti tinimpuunan di Presiden pogulu dati’, Tan Sri Joseph Pairin Kitingan om tinilombus di Presiden tokou do noondo Datuk Seri Dr. Maximus Ongkili… kakal tokou sumusui laang diolo’ diolo’ om nokoundar tokou sabab pasanganu do lansanon di pointotopot kumaa parti,” ka disio.
Dr. Joachim minanangkabayahan nogi’ kumaa di Yiew om tiim dau tu’ nakalantoi pinapaharo ramai makan totuong Toun Wagu Sina 2024, om lumansan do Toun Naga diti kapanahak lobi kgumu’ kalantaion id inggisaman parti montok pogun om mogigiyon Sabah.
Ramai makan totuong dilo’ notindapou nogi’ di Dr. Maximus; tongo’ Kumoduo Presiden, Datuk Seri Dr. Yee Moh Chai om Datuk Jahid Jahim; Monobubut Agayo, Datuk Lum Kim Yun; tongo’ Timbang Presiden, Datuk Haji Ruslan Muharam om Datuk Johnny Mositun; Monunurat Agayo, Datuk Julita Majungki; Luguan Tinimungan Komulakan, Christopher Mandut; om tongo’ Puru Kounsol Akawas di suai, nogi’ puru PBS Bohogian Api-Api.
