Mohd. Nasir Deraman (kotolu, gibang) pinopokito dadah i naahou id kapahabaran, doid Kota Kinabalu, Sabah di konihab.
KOTA KINABALU: Koupisan Kositum Diraja Malaysia (JKDM) Zon Sabah minagala’ sindikit kopoikidan dahah miampai minagahou dadah ponit syabu kiwinagat 205 kilogtram i pikikiro kigatang RM6.85 riong, do hiti di kaawagu diti.
Sindikit dilo’ momoguno takal momolopot dadah id suang polositik teh Cina mogisusuai ponit i pinaatod momoguno surupukaraja’ kurier mantad Semenanjung kumaa Kota Kinabalu.
Tumanud Utusan Malaysia, Monguhup Luguan Potunud Kositum Zon Sabah, Datuk Mohd. Nasir Deraman minoboros, mantad kointalangan om ponoludukan Tinimungan Tempur Medan Operasi Kositum (Cobra), bohogian disio nokoilo 15 kutak lopot miampai kokitanan di kosusuayan ontok nokorikot doid Gudang Pos Aviation di ko 15tw Koduo katatalib, kikiro jaam ko 9.10 kosuabon.
“Nosusuhut dilo’, Tinimungan Tempur minomonsoi pinonungodan di songinan premis (kurier) id Penampang. Asil pinomorisaan potilombus di 15 kutak diti i tintangan minomoguno kakamot pongilo dadah nokoilo do suang 15 kutak dilo’ nopo nga’ dadah ponit syabu miampai winagat kikiro 205 kilogram i pikikiro kigatang RM6.85 riong. Koinsanai dadah nokito id lopot teh Cina mogisusuai ponit.
“Aiso’ nunu-nunu kinopomogombitan id kes diti om inggisaman mogihum bohogian poinggompit kakal tilombuson. Gama’ no do kinapaatadan di winonsoi montok ongoyon id premis kurier, tilombuson tokou inggisaman mongilo di pinapaatod om sanganu lopot dilo’,” ka disio id kapahabaran media doid Wisma Kopogirotankuasa’ Kositum, do hiti di konihab.
Pinointalang disio, modus operandi i gunoon do sindikit dilo’ nopo momoguno surupukaraja’ kurier miampai poposuang dadah id suang polositik om talib dilo’ lopoton momoguno polositik teh Cina mogisusuai wotik om ponit montok mongilag do dadah dilo’ oilaan do bohogian kikuasa’.
Ka disio, lopot dilo’ pinaatod momoguno kargo mantad Semenanjung Malaysia kumaa KKIA om aiso’ alamat sanganu lopot dilo’ tu’ pinangaran ilo’ doid premis komponi kurier montok onuon sondiri’.
Mohd. Nasir minoboros, ilo’ nopo nga’ kinapagahawan bobos agayo dadah montok toun diti om nung koidu’ doid pidagangan, dadah kiwinagat 205 kilogram dilo’ montok kogunaan kikiro 600,000 panagih.
Nuhot nung sindikit dilo’ pinoposili Sabah sabaagi tuumbaya’an, minoboros isio, kes kakal id ponoriukan, om hal miagal dilo’ nga’ maan soriuko’.
Kes soriukon id siriba Seksyen 39B Akta Dadah Berbahaya 1952 i koowit ukuman matai om jiil gisom surupu miampai papasut amu’ okuri’ ko 12 papasut.
Minongomi kotilombus, ka disio, JKDM Zon Sabah mokianu nogi’ tulun ginumuan do manahak sokodung miampai papatahak kopointalangan poinhompit nunu-nunu koponoludupan miampai momoromut piromutan aiso’ kabayar Kositum 1-800-88-8855 toi tumingan id nombo-nombo upis kositum poingoros. Oinsanan mananahak kointalangan maan lisoko’.
