Haji Hajiji Haji Noor.
KOTA KINABALU: Koporintaan Pogun pinopoobi’ RM474.55 riong do toun diti montok monginggirot po do koburuon ‘modal insan’ om poposindak rontob balajaran id pogun diti, ka di Boyoon Montiri, Datuk Seri Haji Hajiji Haji Noor.
Ka disio, kinopoobian dilo’ do wookon montok sikulasip om dermasiswa, kopoburuan om kopoindalanan sikul ugama’ Islam om masjid, kopoburuan tongo’ tinan kougamaan okon Islam, sikul mission, sikul ponit kabansaan om mimpoopori, kopoindalanan longkod pambasaan buuk (perpustakaan) desa om perpustakaan maapanau id poliliput pogun nogi’ kopoindalanan mogisusuai kaparagatan, pingludaan om kurusus komilaan.
Ka disio, balajaran kapapanau tonggungan oponsol id kopoburuan modal insan sinakagon di dumontol i kinaangayan, kiginaras monokitopong, kitoilaan om kikomilaan.
“Koporintaan Pogun toririmo manahak kopomodulianan om koposuulan kumaa kogunaan nogi’ hal balajaran sabaagi wookon ababayan pomogunon, suai ko’ miampai po’ompus mongingkawas rontob balajaran id pogun diti,” ka disio id Ramai Kinapatahakan Setifikit Nokopupus Pinsingilaan Kelas Dewasa Molohingon Tulun Asli om Peribumi (KEDAP) Ko-9 id Lintuhun Resital Univositi Malaysia Sabah (UMS) do hiti di tadau baino’.
Teks boboroson di Hajiji binasa’ di Montiri Sains, Tiknologi om Inovasi Pogun, Datuk Dr. Haji Mohd. Arifin Mohd. Arif.
Soginumu’ 625 tutumanud KEDAP nakaramit setifikit nokopupus pinsingilaan id ramai dilo’.
Ka disio, ponginsamakan pinsingilaan po’ompus surupu Komontirian Balajaran okon nopo ko’ montok tangaanak mimpuun kiumur apat toun maganu balajaran prasikul miampai poinbida’, nga nogi’ tulun nosukod kapaganu pinsingilaan miagal maya’ Ababayan KEDAP i koposodia’ pinsingilaan impuunon kumaa molohing borou pimato id mogigiyon labus kakadayan.
Kalansanan disio kinalantaion tongo’ tutumanud KEDAP minomupus ababayan diolo’, kopoingkawas rontob kotutun pimato id pomogunon diti potilombus dino kosili pongunsub kumaa sukod wagu do mamagampot kalantaion id kaganaan balajaran.
“Iti kopiongoi di angkab Koporintaan Pogun id Palan Koburuon Hontolon Sabah Maju Jaya (SMJ) i poposotol koponsolon kopoburuan modal insan id pogun diti”.
