Dr. Joachim (poindikau, tanga’) guminambar pongingitanan miampai tongo’ Luguan Watas om Luguan Mamasok Pogun.
KENINGAU: Kumoduo Boyoon Montiri II, Datuk Seri Dr. Joachim Gunsalam mokian koinsanai rikod Kuut Mamasok Pogun (MAN) om rikod kootuson pibisaraan aanu pobuukon om silihon sabaagi Jurnal Undang-undang Mamasok Pogun.
Nung intangan intodonon undang-undang id MAN nopo nga’ okuri’ i nokobuuk, ka disio.
“Haro koundaran dau nung kootusan ngaawi’ Kuut i pogulu aanu posuraton om poopion miampai poinsonong montok tuduan sukuon kumaa kes ngaawi’ dumontol.
“Iti tantu’ no do kouhup kuut id kawas nung haro kes kopokinsianan mantad Kuut Mamasok Pogun.
“Potilombus dino, ponorisidan om ponoriukan nga’ kiguno poindalanon miampai lobi poingulud montok papatantu’ silibus ngaawi’ i pinosodia’ miongoi di nubasanan om adat kinoubasanan Mamasok Pogun Sabah,” ka disio ontok pinopoimagon Ramai Kinopohimaganan Pomupusan Kurusus Kararalano’ Pibisaraan om Ponuratan Kinopomohokiman (Tatacara Perbicaraan dan Penulisan Penghakiman) montok koinsanai Luguan Watas pogun Sabah doid Hotel Perkasa, do hiti, di tadau baino’.
Dr. Joachim (koduo, gibang) pinapatahak setifikit kinotonudan kumaa mobi’ tutumanud kurusus soginumu’ 53 tulun, i Luguan Watas Keningau, OKK Ramanus Michael @ Sogunting om sinasi’ di Dr. Jamili (gibang) om i Majaran.
Montiri Koporintaan Koiyonon om Pomuwalaian dilo’ minoboros, Koporintaan Pogun toririmo monokodung tikid angkab om tongo’ katatapan kopohompit Mamasok Pogun id kopoinggorisan tinan kohokiman Mamasok Pogun montok mogowit MAN sabaagi tukod sistem kohokiman id Malaysia.
Ka disio, kopongonjuran kurusus miagal diti pounsubon kopio miagal pinaatag do Koporintaan Pogun id kopotontuan tikid kurusus di poindalanon kapanahak komogoton om waya’ osonong kumaa surupukaraja’ tongo’ Luguan Watas do koinsanai.
Mintong kawagu di inggisaman Koupisan Hal Mamasok Pogun kosuul no Institut Pingludaan Kuut Mamasok Pogun (ILMAN) i kitonggungan manahak pingludaan kumaa tongo’ luguan adat, kurusus miagal diti nopo nga’ kosudong id koponguhupan di tongo’ luguan watas mongingkawas naangayan kopomuruanan diolo’ hinombo do koposotolan di hal tongoponsol id sunduk Sistem Kohokiman Mamasok Pogun kiguno posuulon.
“Tonggungan tongo’ luguan watas kaagal do “Poinlingging di monukod, poinhaba’ i popoudong.” Hal diti kirati, koburu’ toi amu’ surupukaraja’ sosonginan kotinanan tumanud poinponu’ di ginaras om kinabaalon ginoris monokitopong om komilaan sosongulun luguan watas sabaagi ginoris popogura’ id kapagarasan mogigiyon dau do poinpuli.
“Mantad pogi’ dilo’, tongo’ Luguan Watas mositi’ no do papamanau tonggungan di ogirot montok papatantu’ tikid nayatan mogigiyon kaanu surupukaraja’ bobos osonong,” ka di Dr. Joachim.
Mintong di kinoburuon koundangan Mamasok Pogun id Sabah, pinoposorou isio tongo’ Luguan Adat ngaawi’ montok toririmo papabantug om papagaras MAN, songinan kotinanan popiulud di bobos osopung om i otuo id pogun Sabah, mooid ilo’ kotopong di Kuut Syariah om Kuut Sivil.
“Kohondot dilo’, maganu oku kosiwatan diti insan po do mokianu di oinsanan lansanon adat om tinan popoindalan di poinggompit nogi’ oinsanan nayatan mogigiyon do tumilombus papagaras om momogompi’ koubasanan, adat kinoubasanan om tungkusan mamasok pogun i pasanganu tokou diti miampai ososonong.
“Ilo’ nopo nga’ tataba’ pogun i amu’ agatang i tungkusan do sakag dumontol mooi do koubasanan adat kinoubasanan mamasok pogun toririmo ogirot,” ka disio.
Sabaagi popotunud om popogura’ do koburuon Kotinanan Mamasok Pogun, pinokianu nogi’ disio Koupisan Hal Mamasok Pogun Sabah do toririmo tumopot id kopotontuan kopoindalanan Mamasok Pogun koindalan do lobi kopulokis monotk posuni ginaras karaja’ di kiginaras, po’ompus om kisinangal.
Minanangkabayahan kumaa koinsanai tutumanud tu’ tuminanud kurusus diti do opinogot om kisunduan, kalansanan disio mooi do tikid Luguan Watas kapagaras om momogompi’ tungkusan om undang-undang adat Mamasok Pogun mooi do tungkusan adat Mamasok Pogun toririmo pantangon om amu’ oolingan.
Nokotindapou nogi’ Monunurat Pointatap Komontirian Koporintaan Koiyonon om Pomuwalaian, Datuk Dr. Jamili Nais; Presiden Kounsol Hal Ngaawi’ Mamasok Pogun Sabah, Tindarama Dr. Benedict Topin; Potunud Koupisan Hal Ngaawi’ Mamasok Pogun Sabah, Majaran Osman; Upisor Watas Keningau, Peter Jonu; Luguan Pulis Watas Keningau, Yampil Anak Garai om Upisor Komogoton Mogigiyon (CDO) Watas Bingkor, Tinus Majip.
