Hajiji (kaapat, wanan) miampai naalap di suai id Tuaran 2024 Dragon, Unicorn & Lion Dance Festival.
TUARAN: Piuludan om pisompuruan id nayatan mogigiyon Sabah kosili kunci kumaa kasasanangan om koburuon pogun diti, ka di Boyoon Montiri, Datuk Seri Haji Hajiji Haji Noor.
Ka disio, mogigiyon orukut tinaru om bansa’ id pogun diti sopipantang om mamaramai tikid kararamaian om koubasanan do otinsanan miampai poinponu’ piuludan.
Minaganu poombitanan, Karamaian Toun Wagu Sina’ i okon nopo ko’ ramaion do mogigiyon Tionghua id Sabah, nga ngoi’ mogisusuai tinaru id pogun diti nga’ mamaramai dilo’.
Hajiji (tanga’) mniampai naalap di suai minonuntung gandang ponokotanda’ kinopoimaganan Tuaran 2024 Dragon, Unicorn & Lion Dance Festival.
“Iti no kinolumison id pogun Sabah sabab mogigiyon mantad mogisuai tinaru om koubasanan kaanu miamung mamaramai toisoiso’ kararamaian miampai poinponu’ piuludan om aramai.
“Piuludan om pihunungan diti notungkusan tokou mantad komolohingan om mositi’ no dilo’ do tilombuson momogompi’ om potungkusan di sukod wagu,” ka disio ontok pinopoimagon Tuaran 2024 Dragon, Unicorns & Lions Dance Festival doid Padang Dataran Tuaran, do hiti di totuong tadau Minggu’.
Hajiji minoboros, kopogisusuaian dilo’ nga’ kapasaga’ nogi’ do mogigiyon orukut tinaru id pogun diti poinpasi otoronong om oulud.
“Yati’ id Sabah aanu silihon ombitanan om turianan kumaa pogun ngaawi’ suai id Malaysia id hal pihunungan om pisompuruan mogigiyon orukut tinaru om koubasanan,” ka disio.
Hajiji miampai ponokotanda’ minonitik mato singa’ id Tuaran 2024 Dragon, Unicorns & Lion Dance Festival.
Minoboros isio, Koporintaan Pogun maya’ Hontolon Sabah Maju Jaya (SMJ) tumopot popoburu’ pogun diti om mogigiyon dau amu’ momuntuk tinaru om ugama’.
Ka disio, Koporintaan Pogun maya’ Komontirian Ponombuluyan, Koubasanan om Sandad Posorili’ Pogun papaanjur kapamaramaian Karamaian Toun Wagu Sina’ toun diti montok poposindak po do kinaramaion kararamaian dilo’.
Nokotindapou nogi’ id ramai dilo’ i Monguhup Montiri Ponombuluyan, Koubasanan om Sandad Posorili’, Datuk Joniston Bangkuai; Puru Lintuhun Undangan Pogun (ADUN) Pantai Dalit, Datuk Jasnih Daya; Presiden Lions Club Tuaran, Kapitan Frankie Goh om tongo lansanon nokoiyonon.
