Dr. Joachim (tanga’) guminambar pongingitanan miampai mogigiyon kampung om sitaf UPPM DUN Kundasang id Ababayan Kinopoimaganan Lintuhun Mini Kg. Monggis.
RANAU: Kumoduo Boyoon Montiri II po nogi’ ADUN Kundasang, Datuk Seri Dr. Joachim Gunsalam mokianu oinsanan Ponorikohon Puruankuasa’ Koburuon om Koumoligan Kampung (JKKK) id Kundasang do toririmo popigirot piromutan miampai Unit Lansanon Koburuon Mogigiyon (UPPM).
Pinokianu disio Ponorikohon JKKK mooi toririmo miromut miampai UPPM lolobi no soira’ kotoguang nunu-nunu kobolingkahangan om kogugunaan pokisisikapan.
Dr. Joachim i po nogi’ Montiri Koporintaan Koiyonon om Pomuwalaian minoboros dilo’ ontok pinopoimagon Lintuhun Mini Kampung Monggis, id DUN Kundasang, do hiti di konihab.
Lobi 200 mogigiyon Kg. Monggis nakaanu koundaran mantad pinongukaban lintuhun mini wagu mantad di Dr. Joachim i suminain do plak lintuhun okoro’ dilo’.
Lintuhun mini dilo’ tinuridong montok pinongolon balai raya di nakalaid.
Dr. Joachim (tanga’) guminambar pongingitanan miampai mogigiyon i minamaramai tadau kinouliton toun kinosusuon id Ababayan Kinopoimaganan Lintuhun Mini Kg. Monggis.
Dr. Joachim minoboros, lintuhun mini diti aanu gunoon montok popoindalan tongo’ ababayan kampung miagal do ababayan kougamaa, sipoot, ababayan momuruan adat om susuai po.
Minonongkounsikou isio kumaa di Lansanon Koburuon Mogigiyon, Dounis Sani mantad inggisaman minomongo lintuhun mini om minonuhu disio mongilo koinsanai kampung i kiharo kobolingkahangan om mogihum panalasaian sopiuhup.
Dr. Joachim nga’ pinopoilo nogi’ do iso’ pirubaan maan pohoroo’ miampai koinsanai Ponorikohon om Monunurat JKKK do ko 15tw Koduo obontol.
Nokotindapou nogi’ i Monunurat Pulitik kumaa di Dr. Joahcim, Yubidi Gompoyo; Luguan Tanak Mamasok Pogun DUN Kundasang, Dominic Ghani; Ponorikohon JKKK Kg. Monggis, Sylvita Sylvester; Molohingon Kampung, Jackson Nudin om sitaf UPPM.
