Rafie Robert
KENINGAU: Festival Crocker Range ko-6 maan pohoroo’ doid Padang Bandaran Keningau do hiti solinaid apat tadau mimpuun do suab (ko 23tw Kohopod om Iso’).
Onjuron ilo’ di Koisaan Ponombuluyan om Koubasanan Keningau miampai sokodung Kounsol Karaja’ Ponombuluyan Watas Keningau (MTPDK), Kounsol Watas Keningau (MDK) om Kelab Komulakan KadazanDusun Keningau nogi’ mogisusuai koupisan/kotinanan koporintaan om tinan okon koporintaan (NGO).
Ponorikohon Koisaan Ponombuluyan om Koubasanan Keningau, Rafie Robert i po nogi’ Ponorikohon Manganganjur festival minoboros, festival bobos agayo id watas Keningau diti poonjuron montok popointutun produk ponombuluyan nogi’ koubasanan id Poonsokid Sawat kosuul no id Keningau.
Pongonjuran diti iso’ mantad ababayan montok mongunsub ikonomi mogigiyon nokoiyonon om nogi’ monokodung produk ngaawi’ i mimpau mogigiyon kampung id watas diti, ka disio kawagu.
“Mogisusuai ababayan maan pohoroo’ miagal pialaan ‘Miss Crocker Range’, ‘Kids Pageant’, pialaan momowotik om momolukis doun tangaanak, pialaan nansakan koubasanan, pialaan mongulud bunga, pialaan ‘body physique’, pialaan milokud, pinghuyudan koubasanan, pialaan manangon, pialaan koir, pialaan tuunion koubasanan (sompoton/kulintangan), ‘auto-show’, pialaan sayau kogorison, pokikitanan tinaru, pokikitanan om kapadagangan tinunturu’, pokikitanan om kapadagangan asil pomutanaman om ogumu’ po i suai.
“Suai mantad dilo’, artis naalap nokoiyonon nga’ momolihis nogi’ di tutumombului miagal di Stacy, Marsha Milan, Santiana Ramli, Elica Paujin om i Firman (AF) nogi’ ogumu’ po tinimungan pokikitanan i popowonsoi do pokiikitanan,” ka disio id kointalangan di tadau baino’.
Rafie minoboros, pointonod pinongonjuran tohuri no di toun 2018, festival diti amu’ naanu minonilombus nosusuhut tomporuruol Covid-19 i nokoowit kuminaa kinopoindalanan ponuhuan manamong pamanahan (PKP).
Pointonod dilo ka disio, produk ngaawi’ ponombuluyan id Keningau nokoingkuri’ om momoguno ponondulian akwagu.
“Mantad dilo’, bohogian koisaan minggisom manahak sokodung kumaa tongo’ produk ngaawi’ ponombuluyan id Keningau maya’ pongonjuran miagal diti.
“Di wulan Kowalu’ katatalib, Longkod Kopointalangan Ponombuluyan Watas Keningau tinuridong montok papasanang rumirikot toi tutumombului labus do maganu kointalangan di produk ngaawi’ ponombuluyan id Keningau,” ka disio.
Alapon disio oinsanan mogigiyon Sabah do rumikot id festival dilo’ do manahak sokodung kumaa pomorunan ponombuluyan id watas diti.
