Ernywati (koduo gibang) pinapatahak tandamato kuminaa di Arifin (kotolu, wanan).
KOTA KINABALU: Soginumu’ RM28 riong kinorugion gama-gama’ kinopoimamangan maya’ piromuan doid Sabah gisom di wulan Kosiam toun diti.
Montiri Sains, Tiknologi om Inovasi, Datuk Dr. Mohd Arifin Mohd Arif minoboros, ginumu’ dilo’ nakapaampai 1,243 kes om I bobos akawas nokosurat gisom noondo diti.
“Hal diti atalang kopokito do koumoligan siber kiguno onuan kopomodulian poinwagat om pogonuan laang di poinpatut do toinsanan mogigiyon kaampai no pakakaraja’ koporintaan.
“Sundung ginumu’ kinorugion id pogun diti kakal okoro’ nung piadangon ginumu’ id poliliput pomogunon, nga’ kiguno tokou maganu laanag osopung om ‘proaktif’ mooi do kopoingkuri’ waya’ om manamong nunu-nunu kaantakan koumoligan siber mantad karalad om koinggayo gisom osusa’ manamong.
“Kohondot dilo’, koporintaan pogun pinopoindalan minogisusuai inggisaman om ababayan montok papagaras do koumoligan siber.
“Montok monokodung kapatahakan surupukaraja’, bohogian pinotomod tinuridong id Koupisan Surupukaraja’ Komputer Pogun (JPKN) I mongulud eskosistem koumoligan siber di toun 2010 om nuhupan nogi’ di pisokodungan miampai komponi ICT pasanganu koporintaan pogun ilo’ nopo nga’ Sabah Net,” ka disio ontok pinopoimagon BIMP-EAGA Cyber Security Summit 2023, do hiti di tadau Koduo.
Pinointalang nogi’ disio koporintaan koporintaan pogun moningkanan kumaa kobolingkahangan kopongudutan suang piromutan maya’ kinapapanahan Ababayan Kopurimanan Pomusalaan Siber Id Nayatan Pakakaraja’ Koporintaan minimpuun di toun 2022.
“Gisom noondo onom ababayan di nokoindalan id pososorili’ Keningau, Sandakan, Tawau om nogi’ Kota Kinabalu I nokosigampot kikiro 700 kukumaraja’ koporintaan om pamalanan nga’ masaan nogi’ wonsoiyon montok popoinggayo skop hal diti kumaa nayatana tulun ginumuan maya’ piuhupan miampai koombolutan ‘strategik’.
“Id kopotontuan kopoindalanan sistem kapatahakan koporintaan digital di poinpuli om oumolig, oinsanan pakakaraja’ koporintaan apatut proaktif om otimpas id kopinsingilaan toilaan om komilaan digital,” ka disio pinopointalang.
Pitimungan duo tadau nanjur JPKN om Sabah Net Sdn. Bhd. dilo’ natanud di kikiro 200 tulun tutumanud kapaampai Momuruan Digital, Buruan Upisor Digital (CDO) om Upisor Koumoligan ICT (ICTSO) mantad mogisusuai kotinanan koporintaan pogun om tongo’ naalap mantad koiyonon BIMP-EAGA.
Ababayan dilo’ kituduan popouhup kumaa koponginsonongan sistem kapatahakan surupukaraja’ siktor koporintaan mooi do lobi kosonong om oumolig kumaa mogigiyon.
Nokotindapou nogi’ i Potunud JPKN Sabah Ernywati Dewi Abas i po nogi’ Luguan Upisor Koumoligan ICT Pogun Sabah om Monontuduk Puruankuasa’ Manganganjur BIMP-EAGA Cyber Security Summit 2023.
