Armizan Mohd. A
BEAUFORT: Komontirian Pidagangan Suang Pogun om Kosusukupan Masi (KPDN) momoruhang ginumu’ kopoindalanan Ababayan Pidagangan Rahmah (PJR) id Sabah, Sarawak om Watas Pisomuruan Labuan montok wulan Kohopod om Iso’ om Kohopod om Duo 2023.
Suai kopomoruhangan ginumu’ kopoindalanan, KPDN nga’ papatantu’ nogi’ kopouyuhan sitok manuk oruhangan miampai gatang kapadagangan rahmah id rontob diskaun pialatan 10 gisom 30 pihatus.
Ponowoli Montiri KPDN, Datuk Armizan Mohd. Ali minoboros, ponginsomokan diti onuon sabaagi iso’ karalano’ kohompitan montok papasaga’ mogigiyon kikonuunuan osiriba’ om gonsuhatan kaanu piromutan kumaa pangaba’ manuk id gatang di poinpatut.
“Kopoindalanan ponginsomokan diti potingkananon id koiyonon ngaawi’ i pinoruput kiharo kobolingkahangan kapadagangan gatang di akakawas id pidagangan nokoiyonon.
“Ponginsomokan diti nga’ kopiongoi nogi’ di inggisaman montok monoibau nunu-nunu hal koimbulai kopogompit gatang manuk nosusuhut kinapahabaran pinoningkodan laang naamot kapatatapan gatang pitamangan montok manuk pointonod ko 1tw Kohopod om Iso’ 2023.
“Laang kapanatapan gatang pitamangan naamot dilo’ pinoindalan pointonod wulan Koduo 2022 sasabab no do gatang di adalaan kasawat id timpu dilo’ i nakapaampai panahakan subsidi kumaa momumutayam,” ka disio id kopointalangan di tadau baino’.
Ka disio, montok rikod, kapanatapan gatang pitamangan naamot manuk super pogulu ko 1tw Kohopod om Iso’ 2023 montok Sabah kopohompit duo gatang ilo’ nopo RM12/kg montok Tisan Kotonobon om RM12.30/kg montok Tisan Kosilahon.
Id Sarawak, kapanatapan gatang pitamangan naamot manuk super pogulu diti sopisuai tumanud watsa miampai rontob id pialatan RM10.80/kg gisom RM13.90/kg.
Daamot dilo’, gatang pitamangan manuk super montok Labuan nopo nga’ RM12.30/kg.
Armizan minoboros, miampai pinoningkodan laang panatapan gatang pitamangan naamot minimpuun ko 1tw Kohopod om Iso’ 2023, KPDN pinopoindalan kopogintangan tadau-adau gisom di ko 4tw Kohopod om Iso’ 2023 id mogisusuai premis doid pototongkop Malaysia.
Montok Sabah, ka disio, asil pinogintongan nokoilo gatang manuk super id pidagangan nopo id pialatan RM11.49/kg gisom RM13.90/kg, naamot id Sarawak kopouyuhan gatang id pidagangan nopo id pialatan RM8.90/kg gisom RM18.90/kg. Naamot dilo’, gatang manuk super id pidagangan Lbauan nopo id pialatan RM9/kg gisom RM13.90/kg.
Ka disio, KPDN mokianu sokodung tulun ginumuan montok popoilo kumaa komontirian nung kiharo ruputan, kaanu momoromut maya’:
i. WhatsApp 019-279 4317 / 109-848 8000;
ii. Portal e-Aduan KPDN ilo’ nopo nga’ http://eduan.kpdn.gov.my;
iii. Call Centre 1-8000-886-800;
iv. E-mel e-aduan@kpdn.gov.my;
v. Aplikasi Telefon Pintar Ez ADU KPDN;
vi. Bilik Gerakan Pogirotkuasa’ 03-8882 6088 / 6245, om;
vii. Kod QR Aduan Bekalan.
