Hajiji om i Fahmi guminambar miampai dilo’ nakalantoi gaa’.
KOTA KINABALU: Kotinanan media kapapanau tonggungan oponsol id kopotontuan pomorunan koponuratan id Sabah kotilombus ogirot maya’ kogompitan sukod wagu sabaagi tumungkus id kaganaan dilo’, ka di Boyoon Montiri, Datuk Seri Hajiji Haji Noor.
Minoboros isio, iti nosusuhut amu’ ogumu’sukod wagu orohian poposili kaganaan koponuratan sabaagi sumpili’ karaja’ tu’ wookon nopo dilo’ kopouyuhan gaji di patahakon amu’ songkuro koimbayat.
“Pinoilo oku do amu’ ogumu’ sukod wagu momili’ toi umampai id kaganaan koponuratan sabaagi karaja’ diolo’. pikikiro doti’ norikot nodi timpu montok kotinanan media popouyu gaji om tongo’ insentif di kopiongoi.
“Iti montok papatantu’ lobi kogumu’ sukod wagu sumompuru kaganaan koponuratan diti id timpu dumontol,” ka disio ontok pinopoimagon Kinabalu Press Awards 2023 do hiti di songkosodop.
Karait do ababayan dilo’, otumbayaan isio pongonjuran Kinabalu Press Awards (KPA) tikid toun kopongunsub sunduan kumaa koinsanai monunurat habar montok tumilombus momonsoi sinuratan habar di kiwaya’ akawas om manahak waya’ osonong kumaa tongo’ mamambasa’.
“Ababayan nopo diti mamagaa’ di puru media i nokowonsoi sinuratan kapahabaran di osonong. Okito ku pongonjuran KPA diti kotilombus kosudong id kapanahakan pamaga’an kumaa puru media id pogun diti. Kalansanan kopongokunan sodop diti kopoingkawas po do naangayan koponuratan id pogun diti,” ka disio.
Naamot dilo’, minoboros isio, id timpu tolu nogi toun minonowoli pomorintaan, koporintaan pogun nakaanu minogowit suminuang lobi mantad RM33 bilion gatang kopoopuan kumaa Sabah om nakalantoi nokoposurat nopuhu asil di bobos akawas ilo’ nopo nokosigampot gisom RM7 bilion.
“Miampai naangayan ikonomi di osonong, Hontolon Sabah Maju Jaya (SMJ) do noondo nga’ id waya’an di kohunung om nokotimpuun kopokito asil osonong. Kinalantaion nosigampot nogi’ id mogisuai siktor i kapanahak koposuulan maya’ SMJ miagal pomorunan, pomutanaman om ponombuluyan kaampai kopoburuan modal insan montok papatantu’ tanak-anak amu’ oiduanan id pitorinaan balajaran diolo’ potilombus dino kosiwatan pakarajaan.
“Sundung ingkaa, ogumu’ po i nuu’ tokou powonsoiyon. Koporintaan pogun tumilombus minggisom montok popoinparagat po do kopoburuan om komogoton suai ko’ monginsonong kopoposion rayat maya’ kopoindalanan mogisusuai ababayan om inggisaman i kapaampai mogisuai siktor kopoburuan,” ka disio.
Kokito kumaa kalantaion om inggisaman koporintaan pogun, mokianu isio moomoguno media kotilombus monguhup koporintaan id kopotonuan kointalangan karait kalantaion ngaawi’ i nosigampot gisom kumaa nayatan siriba’ mooi do kopongingkawas kotumbayaan rayat kumaa koporintaan.
“Iti kopiongoi di ababayan totuong diti i ki’uhu ‘Progress Through Smart Partnership’, sabaagi kokitanan kumaa pisokodungan pintar pialatan popoburu’ media om koporintaan pogun Sabah, kosuul no id koporuputan karait katatapan om kopoburuan i owiton do koporintaan.
“Pisokodungan pintar pialatan momoguno media om koporintaan pogun oponsol kopio om kiguno tilombuson monginggirot montok papatantu’ kalantaion i osigamot maya’ Hontolon SMJ aanu poporikot miampai mitilombus kumaa rayat,” ka disio.
Lumansan nogi’ isio Upis wagu SJA papasanang koisaan papaharo mogisusuai ababayan miampai puru ngaawi’ dau.
“Koporintaan posodia’ monimbang inggisaman montok monguhup koisaan diti do monuridong linimput SJA do timpu obontol,” ka disio.
I nokotindapou Montiri Piromutan om Digital, Fahmi Fadzil; Monguhup Montiri Ponombuluyan, Koubasanan om Sandad Posorili’ Sabah i po nogi’ Mongingigit Tonggungan SJA om bagas President SJA, Datuk Joniston Bangkuai om Presiden Sabah Journalist Association (SJA), Datuk Muguntan Vanar.
Nokotindapou nogi’ Monijor Agayo Totuo, Piromutan om Komunikasi Strategik Tinimungan PETRONAS, Datin Anita Azrina Abdul Aziz; Ponorikohon om Timbang Presiden Totuo Pongindopuan Huluan, Shell Malaysia, Siti Hurrairah Sulaiman; Potunud Qhazanah Sabah Berhad, Datuk Dr. Johnson Tee; Potunud Yayasan Sabah, Dato’ Sri Ghulamhaidar Khan Bahadar om Potunud Media om Piromutan, Koupisan Boyoon Montiri Sabah, Datuk Lucy Irene Yong nogi’ mananapanai om puru media id Sabah.
