Hajiji Haji Noor
KOTA KINABALU: Koporintaan Pogun mimang lobi kogumu’ mongungusaha’ id Sabah mongimbulai taakanon halal i okon nopo ko’ montok pidagangan nokoiyonon, nga nogi’ kumaa nayatan sompomogunan.
Boyoon Montiri, Datuk Seri Hajiji Haji Noor minoboros, Sabah pasanganu mogisusuai produk takanon i aanu pointangaon di tongo’ mongungusaha’ nokoiyonon gisom nayatan lobi kasawat.
Minoboros isio, sundung kogompitan mongungusaha’ kaampai pomorunan mikro okoro’ om gonsuhatan (PMKS) id pomorunan akanon halal id pogun diti nokoinggumu’, nga’ kakal kiguno poinggumuon.
“Mimang tokou kokito kogompitan lobi kogumu’ mongungusaha’ id kaganaan produk halal id Sabah. Mongungusaha’ wagu om i poinharo mantad nga’ kiguno momoguno poinponu’ expo halal i pohoroon montok mongingkawsa om popoinggayo pongindopuan diolo’,” ka disio id Kinopoimaganan Expo Halal Sabah (SAHEX) om Karnival Baurung-urung doid Sabah International Convention Centre (SICC) di tadau Ko’onom. Teks boboroson disio binasa’ di Speaker Lintuhun Undangan Pogun Sabah, Datuk Seri Kadzim Haji M. Yahya.
Hajiji minoboros, koporintaan opoduli’ kopio di koponguludan halal id pogun diti nosusuhut pidagangan sompomogunan pomorunan halal pomogunan pikikiro kosigampot ginumu’ USD2.4 trilion do 2024.
Ka disio, kopodulianan kopoirntaan opokitanan maya’ pinonuridongan Kounsol Halal Sabah (MAHAS) i kitonggungan sabaagi tinan pinotomod koporintaan id pogibabarasan, monorisid om momonsoi katatapan di hal ngaawi’ halal om mangatag laang wagu monotk popoburu’ pomorunan halal id pogun diti.
Kadzim (koduo, wanan) minongob’ di Boyoon Montiri pinopoimagon Expo Halal Sabah (SAHEX) om Karnival Baurung-Urung.
Minoboros isio, i oponsol id koponguludan halal nopo nga’ oinsanan boogian, koupisan om kotinanan koporintaan i poinggompit moningkanan kumaa papagaras do kapanahakan setifikit halal kosuul no kumaa PMKS.
“Iti oponsol mooi do PMKS nga’ kaanu monokitopong om pasanganu ginaras id pidagangan pomorunan halal id pogun diti,” ka disio kawagu.
Maya’ inggisaman di pinoindalan koporintaan pogun, kalansanan disio Expo Halal Sabah di pinaanjur kopoinggirot po do korotian ‘Pensijilan Halal Malaysia’ kumaa tongo’ popoburu’ pomorunan om tutumombului expo.
“Expo diti kaanu popironit piromutan pisokodungan popoburu’ pomorunan halal id suang om labus pogun, suai ko’ popointutun produk ngaawi’ halal wonsoi nokoiyonon id pogun diti,” ka disio.
Karait Karnival Baurung-Urung, Hajiji minoboros, koporintaan pogun mongunsikou kinopoonjuran karnival dilo’ montok poposuni piupakatan om pihunungan id mogigiyon miampai amu’ mogintong tinaru, sinakagon om ugama’ id pogun diti.
Kalansanan disio Karnival Baurung-Urung sabaagi wookon tataba’ koubasanan pogun i aanu pointangaon kumaa tutumombului mantad suang om labus pogun.
Ka disio, mogigiyon Brunei i pasanganu mogisusuai tungkusan seni koubasanan om adat kinoubasanan, kanau sumili sombohogian mantad mononokodung id siktor ponombuluyan.
“Inggisaman po’ompus kiguno powonsoiyon montok papasarok siktor ponombuluyan. Karnival miagla diti kiguno pointutunan sabaagi iso’ mantad produk montok mongingkawas intodonon nindopuan ponombuluyan pogun Sabah,” ka disio.
