Masiung minokinongou kopointalnagan mantad PDRM ontok tuminombului doid pokikitanan koumoligan kopihondot ababayan dilo’.
TONGOD: Tongo’ molohingon mogigiyon id watas diti potoguang laang kopongiduan karaja’ kaampai owiton id kuut nung oilaan no mongumolig modidikot songkosuayan aiso’ kasagaan (PATI).
Puru Lintuhun Undangan Pogun (ADUN) Kuamut, Datuk Masiung Banah minanahak kopoingatan do amu’ isio olosu’ di nombo-nombo momuruan adat toi Puruankuasa’ Koburuon om Koumoligan Kampung (JKKK) nung amu’ no poporuput kinohoroon PATI id kampung pitamangan diolo’.
“Nung kikointalangan ogirot do monongkiupakat yolo’ di nombo-nombo komponi toi touki i mamagaji PATI, momumuruan dilo’ poiduon karaja’ do misindikot,” ka disio ontok minoboros pniopoimagon Ababayan Kopurimanan Koumoligan do hiti di kosuabon baino’.
Masiung pinoposotol, ukuman awagat nga’ poingindad nogi’ di nombo-nombo tulun toi touki id watas diti i maganu PATI kumaraja ilo’ nopo nga’ i aiso’ dokumen om pas di nookunan.
Ponorikohon Kotinanan Koburuon Pomuwalaian om Kakadayan (LPPB) dilo’ mokianu tikid lansanon om puru mogigiyon amu’ monongkiupakat miampai nombo-nombo ejen pakarajaan kapaampai PATI montok tuduan komersial.
Tumanud disio, indeks kopomusalaan id pogun diti di kapaampai PATI nokoposurat kes bobos akawas.
Masiung minongunsub tongo’ molohingon kampung om JKKK do miontong-ontong di mongungusaha’ kabun sawit om gata’ id kinoiyonon diolo’ sompoopori om poporuput kumaa bohogian kikuasa’ nung koilo do haro diolo’ i mamagaji pakakaraja’ PATI.
Lobi 300 tutumanud kapaampai molohingon kampung, ponorikohon JKKK om lansanon nokoiyonon tuminindapou ababayan sangadau dilo’ i nanjur do Kounsol Koumoligan Pogun (MKN) miampai sokodung Upis Watas Tongod id Lintuhun Poingukab Dataran Tongod.
Minaganu nogi’ do bohogian id pokikitanan ababayan dilo’ o Koupisan Oftalmogologi Walai Pongubatan Duchess of Kent (HDOK) Sandakan, Suruhanjaya Surupukaraja’ Koporintaan (SPA), Pulis Diraja Malaysia (PDRM), Regimen 516 Susumangod Wataniah, Agensi Antidadah Kebangsaan (ADK), Koupisan Kopointalangan (JaPen), Koupisan Surupukaraja’ Kotundunan Am om Celcom.
Upisor Watas Tongod, Nelson Domil Ulok; Luguan Watas MKN Kota Kinabalu, Amirsyah Mohd. Nor om i Luguan Watas MKN Sandakan, Monday Fadzli Zainal Abidin nga’ nokotindapou doid kinopoimaganan dilo’.
