Jahid (tanga’) pinapatahak watikah koposilihan kuminaa songulun Ponorikohon JKKK mantad Mukim Pantai, om sinasi’ dilo’ lansanon suai.
TAMPARULI: Tongo’ lansanon i sinili Ponorikohon Puruankuasa’ Koburuon om Koumoligan Kampung (JKKK) nunsub popoindalan karaja’ diolo’ miampai poinponu’ tonggungan om ponungkayanan.
Montiri Koburuon Labus Kakadayan Sabah, Datuk Jahid Jahim minoboros, suai ko ilo’, piromutan oronit JKKK om mogigiyon kampung id kinoiyonon sompoopori montok papatantu’ nunu nopo hal di pinalan aanu popoindalan.
“Sasaru’ tokou poposorou do JKKK nopo nga’ ponokotoruntud om tukod agayo id nayatan kampung, i nosili mato om tolingo koporintaan,” ka disio ontok pinopoimagon Ababayan Kapatahakan Watikah Koposilihan JKKK Montok Watas Lintuhun Undangan Pogun (DUN) N.14 Tamparuli id Pisuk Mitingan Bukit Perahu, Upis Watas Okoro’ Tamparuli di tadau Kolimo.
Nokotindapou nogi’ i Monguhup Upisor Watas Okoro’ Tamparuli, Herman Tungginging; Lansanon Koburuon Mogigiyon (PPM) Tamparuli, Madin Anak; Monunurat Pulitik Komontirian Koburuon Labus Kakadayan, Jilias Lintar; Monunurat Olisok Kumaa Montiri, William Ugau; Monunurat Piromutan, Romeo Sindeh om i Monguhup Upisor (Koburuon) Watas Okoro’ Tamparuli, Jefferson Jonathan.
Jahid minoboros, JKKK kitonggungan mokinongou kobolingkahangan mogigiyon id pitamangan diolo’ om potilombus dino poposuku’ dilo’ kumaa bohogian poinggompit montok kopogihuman panalasaian.
“Kopisanangan popoindalan karaja’ kumaa koinsanai di sinili, kalansanan kaanu kou ngaawi’ popoindalan karaja’ miampai osonong om kosili turianan di nombo-nombo JKKK di suai,” ka disio.
Id ababayan toniba’ dilo’, siam ponorikohon JKKK wagu nakaramit watikah kinoposilihan montok Mukim Pantai, ilo’ nopo nga’ Kampung Bukit Giling, Bakut Muhibah, Tambalugu, Lakang, Tambulaong, Dansangai, Kauluan Ulu om Kampung Nohirot.
