Acryl ontok pinokorohan Pingat SPDN di Tun Juhar.
KOTA KINABALU: Bagas Luguan Pulis Pogun, Tan Sri Acryl Sani Abdullah di konihab minamaramit Seri Panglima Darjah Kinabalu (SPDK) i minogowit pongundadait “Datuk Seri Panglima”.
Isio po nogi’ Ponorikohon Perbadanan Usahawan Nasional Berhad (PUNB) minamaramit darjah kapantangan dilo’ minonogulu nogi’ nuludan 206 mamaramit gaa’ darjah kogoyoan, bintang om midol apantang kopihondot pinamaramaian Tadau Kinohodion Pinotomod Molohingon Pogun (TYT) Ko-70, id Lintuhun Istiadat Istana Seri Kinabalu.
Naamot dilo’, bagas Ponorikohon Puspanita Raan Sabah, Datuk Hairani @ Rosenani Hussaini; Potunud Tabung Haji Watas Sabah om Sarawak, Datuk Nurlaila Said; Luguan Koupisan Ponoriukan Kopomusalaan Pulis Kuala Lumpur, SAC Dr. Jamaluddin Mohd Ali wookon 26 tulun i nokoulud mamaramit ‘Panglima Gemilang Darjah Kinabalu’ (PGDK) i minogowit pongundadait “Datuk”.
Supian minamaramit gaa’ ASDK pinotunui di Tun Juhar (wanan).
Nakaramit nogi’ do PGDK i Potunud Balajaran Pogun, Datuk Raisin Saidin; Ponorikohon Urban Development Corporation Sdn. Bhd. (SUDC), Datuk Jamawi Jaafar; Kumoduo Molohingon Kounsol Ugama’ Islam Sabah (MUIS), Datuk Malai Ali Malai Ahmad om susuminding nokoiyonon, Datuk Francis Landong.
Daamot dilo’, Kumoduo Potunud Koupisan Kopointalangan (JaPen) Pogun Sabah, Supian Musa om Kumoduo Ponorikohon Kotinanan Koubasanan Pogun Sabah (LKTNS), Stanis Buandi wookon mamaramit ‘Ahli Setia Darjah Kinabalu’ (ASDK), naamot Monunurat Habar kumaa Kumoduo Boyoon Montiri po nogi’ Montiri Koporintaan Koiyonon om Pomuwalaian, Celestina Ubing minamaramit ‘Ahli Darjah Kinabalu’ (ADK).
Tun Juhar minamagaa’ PGDK kuminaa di Nurlaila (gibang).
Istiadat kinapamaga’an pinoindalan di Molohingon Pogun Sabah, Tun Juhar Mahiruddin om notindapou nogi’ di sawo disio, Toh Puan Norlidah R.M Jasni.
Id istiadat dilo’, Tun Juhar minamagaa’ nogi’ watikah kinoposilihan sabaagi ‘Jaksa Pendamai’ (JP) kuminaa di bagas ADUN Balung, Datuk Osman Jamal, Puru Kotinanan Potunud Kotinanan Koburuon Pomuwalaian om Kakadayan (LPPB), Suzeinah Saulkmen om i Mohamed Nazim Maduarin.
