Mohd. Nazri (tanga’) minonorikohon Mitingan AJP PPN Sabah id songinan hotel doid Kota Kinabalu.
KOTA KINABALU: Kotinanan Momukabun Pogun (PPN) Sabah pinapaatag mooi do tusin poobion montok kotinanan momukabun id Sabah om Sarawak patahakon kotilombus kumaa goduduo pogun mimpuun toun tiso’ sopisuai di maya’ do Kotinanan Momukabun Kabansaan (NAFAS) do noondo diti.
Ponorikohon PPN Sabah, Datuk Mohd. Nazri Abdullah minoboros, karalano’ dilo’ kopiongoi di kinotopoton Koporintaan Pisompuruan monumboyo’ Pibatosan Malaysia 1963 (MA63) montok papatantu’ kogugunoon Sabah om Sarawak aanu momogonop.
Ka disio, atag karait karalano’ kapatahakan tusin poobion kumaa goduduo pogun Borneo dilo’ pinatantu’ ouli’ rolou di mongongobi’ ontok Mitingan Agayo Toun-toun PPN Sabah i pinaharo di tadau Kolimo katatalib.
“PPN Sabah kopopongo pinapaharo Mitingan Agayo Toun-toun tadau Kolimo katatalib hinombo koinsanai mongongobi’ mantad 26 Kotinanan Momukabun Watas (PPK) om PPN pinapaatag mooi do mimpuun toun tiso’ oinsanan tusin poobion kumaa Sabah om Sarawak mositi’ no do onuan ponimbangan montok patahakon mitilombus kumaa PPN pogun dilo’ sondiri’ suai ko’ noondo i poindalanon do Kotinanan Momukabun Kabansaan.
“Iti kopiongoi di tonggungan koporintaan miagal pinoboros di Luguan Montiri, Datuk Seri Anwar Ibrahim do monimbang isio nunu nopo montok Sabah om Sarawak kopihunung di Pibatosan Malaysia 1963,” ka disio id kapahabaran media katalib minonorikohon Mitingan Puru Nuludan Potunud (AJP) PPN Sabah, do hiti.
Minoboros isio, kapatahakan tusin poobion miampai mitilombus kumaa PPN Sabah om Sarawak kapatantu’ ponguhupan kumaa tinimungan momukabun, momutayam om monginsada’ katahak miampai lobi kosikap mooi do koundaran dilo’ aramit osisikap do tinimungan porikatan.
Ka disio, i Luguan Montiri tantu’ no do karati di kogugunaan tinimungan momukabun, momutayam om monginsada’ lolobi podi id Sabah om Sarawak i tantu’ no do momoguno lobi kogumu’ kopongobian id inggisaman monginsonong rontob koposion diolo’.
Maya’ kapatahakan mitilombus tusin poobion dilo’ ka disio, tinimungan momukabun, momutayam om monginsada’ id Sabah om Sarawak kaanu mamaramit ponguhupan i pinosodia’ koporintaan miampai lobi kosikap nung piadangon di maya’ do NAFAS miagal pinoindalan babaino’ diti, suai ko’ kopogkikit balanja’ koporintaan id sunduk kos ‘logistik’ kapaatadan ‘input’ mantad Semenanjung.
“Monurat tokou nogi’ do surat kumaa di Luguan Montiri om otumbayaan tokou do manahak isio ponimbangan kumaa hal diti.
“Nung koindalan iti, koponginsikap ilo’ o ponguhupan minsiriba’ kumaa mogigiyon i mamaramit dilo’ sabab wonsoiyon om torinaon doid Sabah om Sarawak pogulu pootodon kumaa mamaramit.
“Mantad dilo’, ponguhupan dilo’ oruhai korikot, potilombus dino koponguhup papasanang inggisaman koporintaan popoindalanan kapatahakan ponguhupan,” ka disio.
Id Mitingan Agayo Toun-toun PPN Sabah ko-35 Toun 2023 i pinapanau di ko 13tw Kohopod, 2023, pipiro atag pinolulus mongongobi’ montok monginsonong waya’ surupukaraja’ tinan dilo’ id pogun diti.
Wookon dilo’, mokianu koporintaan, maya’ Komontirian Pomutanaman om Kojominan Takanon (KPKM) do papatahak kopoindalanan karaja’ Kuntirik Kapangabaan Baja om Pamawanit id siriba’ Skim Baja Parai Koporintaan Pisompuruan (SBPKP), Skim Insentif Kopolobusan Parai (SIPP) nogi’ Skim Subsidi Baja om Pamawanit Parai Tidong (SBRPB) id Sabah kumaa PPN Sabah.
Ilo’ montok papasaga’ karaja’ kopoikidan input kumaa mororobuat poinrojistor id Sabah poindalanon sondiri’ do PPN Sabah miamapi 27 PPK id Sabh om amu’ nodi patahakon kumaa NAFAS i poinlongkod om torinaon id Semenanjung Malaysia.
Maya’ do atag dilo’, karalano’ koponguludan om kopoindalanan kopoikidan tusin poobion montok mororobuat Sabah poindalanon sondiri’ miampai kilongkod do kotinanan mantad Sabah montok momorikot suai ko’ kopiongoi di MA63.
Naamot dilo, i Mohd. Nazri minongomi Bajet 2024 i pinawalad di Luguan Montiri tadau Kolimo di katatalib sabaagi bajet di osonong om agayo koundaran dilo’ kumaa mogigiyon kaampai no puru kotinanan momukabun id Sabah.
“Monongkounsikou tokou kumaa di Luguan Montiri i opoduli’ kumaa mogigiyon momukabun, momutayam om monginsada’. Miampai toluod di agayo id bajet toun tiso’, otumbayaan tokou ogumu’ koundaran opurimanan tinimungan momukabun, momutayam om onginsada’ id koinsanai kaganaan i ampayaton diolo’,” ka disio.
Bajet 2024 i pinawalad di Luguan Montiri do wookon pinoposodia’ kousinan RM2.6 bilion montok kapatahakan mogisusuai koyuon subsidi om insentif kumaa mororobuat ranahon om monginsada’ suai ko’ RM400 riong montok popoindalan Ababayan Kopoinggirotan Kojominan Takanon.
Kopoobian dilo’ miampai amu’ mitilombus kapanahak koundaran kumaa tinimungan momukabun, momutayam om monginginsada’ kaampai id Sabah om Sarawak.
