Nik Mohd. Shaharil ruminamit tandamato mantad di Mohd. Nazri katalib pinopoimagon Mitingan Agayo Tounan PPN Sabah Ko-35 id Promenade Hotel, Kota Kinabalu.
KOTA KINABALU: Lembaga Kotinanan Momukabun (LPP) pointootopot monguhup Kotinanan Momukabun Pogun (PPN) Sabah montok monuridong piromutan pomorunan parai di ogonop id inggisaman mongingkawas kopolobusan parai id pogun dtii.
Kumoduo Luguan Potunud (Opeasi) LPP, Nik Mohd. Shaharil Nik Md. Hashim minoboros, inggisaman dilo’ kopiongoi inggisaman monumboyo’ atag montok poposili Sabah sabaagi tangkob parai di kumoduo pogun.
Ka disio, piromutan pomorunan parai di ogonop kapaampai do koposodiaan bibit parai, pomoroduan, pananaman, pamajaan, pongomotan om pengilangan parai.
“Konsep tokou, bibit posodiaon tokou, mananom parai yahai papatanom, naamot mangaradu om mongomot parai nga’ momoguno injin PPN.
“Kalansanan tokou nogi’ haro kilang parai nogi’ id Sabah i potilombus dino koponuridong piromutan pomorunan parai di ogonop id Sabah.
“Iti wookon angkab tokou om PPN Sabah montok papalantoi atag poposili Sabah sabaagi tangkob parai di koduo,” ka disio soira’ rinubaan katalib pinopoimagon Mitingan Agayo Tounan PPN Sabah Ko-35, do hiti di tadau baino’.
Nokotindapou nogi’ i Ponorikohon PPN Sabah, Datuk Mohd. Nazri Abdullah; Kumoduo Luguan Potunud (Kopoburuan) LPP, Amir Matamin om Potunud LPP Sabah, Hadriyani Ahmad.
Nik Mohd. Shaharil minoboros, Sabah pasanganu ogumu’ kosiwatan i aanu gunoon id pomutanaman, kaampai monotk poposili tangkob koduo montok koumoligan takanon.
Ka disio, pipiro watas id pogund iti, kosuul no Kota Belud, Papar, Keningau, Pitas om Beluran pasanganu koiyonon di agayo montok pananaman parai.
Nosusuhut dilo’, minoboros isio, PPN Sabah kiguno moningkanan id kopoinggoyoan po do pomorunan parai id pogun diti mooi do lobi kogumu’ puru Kotinanan Momukabun aanu pogompiton id ababayan dilo’.
“Koporintaan pinopo’iliu kalansanan mooi do PPN umampai mamagampot inggisaman montok mongingkawas rontob kosukunan tinan (SSL) kopolobusan parai pogun i noondo diti nokosigampot kikiro 70 pihatus,” ka disio.
Nokopogulu, Mohd. Nazri minoboros, norikot nodi timpu do Kotinanan Momukabun id Sabah maganu laang lobi aparagat do mamalan om popoindalan projik pomutanaman toi pomogunan mimpau takanon id pogun diti.
Ka disio, ogumu’ ababayan aanu poindalanon miampai ponguhupan kousinan i pinosodia’ koporintaan maya’ LPP asal po do Kotinanan Momukabun, kaampai id nayatan watas (PPK) kopotoguang upalai kousinan montok projik dimaan poindalano’.
“Kobolingkahangan nopo yati’ amu’ mongupalai nanamot ogumu’ kousinan pinoobi’ di patahakon. Mantad dilo’ pokionuon ku Kotinanan Momukabun id Sabah momonsoi upalai mimpuun montok projik toun tiso’.
“Haro do somoonu otogod tokou kumaa koporintaan soira’ LPPamu’ manahak poruntukan nga’ yati i amu’ mongupalai. Mantad dilo’, pokionuon ku koinsanai PPK id Sabah do momonsoi kopongupalaian,” ka disio.
