Tun Juhar (toguang koduo, wanan) kinoruhang di Toh Puan Norlidah ontok ababayan minomutul kek
KOTA KINABALU: Koisaan Tinaru id Sabah pinokianu mongunsub sukod wagu minsingilo adat koubasanan sompooori, suai ko’ komilo moboros id boros sandad.
Boyoon Montiri, Datuk Seri Hajiji Haji Noor minoboros, kointutunan tinaru pogun diti atagak nung tungkusan boros om koubasanan amu’ gompion.
“Kopiongoi dilo’, unsubon ku koinsanai lansanon tinaru id pogun diti do mampai kporintaan papatantu’ tungkusan koubasanan kotilombus ogompi’ montok dati’ om sinakagon dumontol.
“Id kinosorokon dati’ do popoburu’ pogun, amu’ tokou kaanu monolikud koponsolon adat om kopogisusuaian koubasanan sabab ilo’ nopo nga’ hal oponsol koposion kopokitokointutunan toisoiso’ tinaru montok tumilombus ogompi’ om kabantug.
“Inggisaman dilo’ okon ko’ montok nopo papatantu’ kointutunan tinaru do osoibahan di kinoinwoguan om tiknologi nga nogi’ kaanu monguhup kumaa kopoburuan pgoun kosuul no id sunduk ponombuluyan,” ka disio ontok minoboros id Karamaian Tadau Etnik Sabah 3.0 do hiti di tadau Koduo katatalib.
Hajiji nga’ pinopoilo nogi’, id inggisaman papagaras tataba’ koubasanan, koporintaan pogun manganjur pipiro ababayan poinggompit wookon nopo ‘Museum and Cultural Festival 2023’ montok popokito om popointutun ‘kreativiti’ tinaru.
Teks boboroson disio binasa’ di Kumoduo Boyoon Montiri II, Datuk Seri Dr. Joachim Gunsalam i po nogi’ Ponorikohon Puruankuasa’ Induk Kapamaramaian Kinouliton Toun Kinosusuon Pinotomod Ko-70 di Molohingon Pogun (TYT) Sabah.
Daamot dilo’, Montiri Ponombuluyan om Sandad Posorili’, Datuk Christina Liew minoboros, kinopoimpuunan Album Lagu Rakyat Etnik Sabah nopo nga’ kopongunsikohan pinotomod kumaa koisaan i minanahak kouhupan doid kinoponondulian gompi’ tungkusan koubasanan boros id upa’ sinding-sinding rayat i tiniip di toun nakatalib.
Id ababayan ki’uhu “Memartabatkan Budaya Entik Sabah” (Pabantug Koubasanan Tinaru Sabah) dilo’, i Molohingon Pogun TYT Tun Juhar Mahiruddin om sinawaan, Toh Puan Norlidah R.M Jasni pinapatahak setifikit pongunsikohan kumaa 16 kotinanan om koisaan tinaru i pinapalantoi poniipan sinding rayat.
Nokotindapou nogi’ i Speaker Lintuhun Undangan Pogun, Datuk Seri Kadzim M Yahya, Monunurat Koporintaan Pogun, Datuk Seri Sr. Safar Untong, nuludan kabinet pogun, om tongo’ presiden tinan koubasanan.
