Hajiji suminain plak Buuk Antologi Puisi om Cerpen pinosoliwan Gapena kopihondot kinopoimpuunan Tadau Sastera Ko-19.
KOTA KINABALU: Kinolumison Sabah om kopogisusuaian seni koubasanan adat kinoubasanan i haro id pogun diti kiguno gunoon poinponu’ di tongo’ popoburu’ sastera montok momonsoi sinupuan di tongosonong.
Boyoon Montiri (KM), Datuk Seri Hajiji Haji Noor minoboros, iti kopiongoi di tonggungan koporintaan pogun i toririmo monokodung inggisaman om ababayan montok papabantug sseni koubasanan nogi’ adat kinoubasanan mogigiyon nokoiyonon id pogun diti.
“Sabah agayo kopio om opuawang do koubasanan nogi’ adat kinoubasanan. Pogun diti nopo nga’ kiharo 35 etnik om 217 sub etnik i moboros id lobi 50 boros om 80 dialek etnik.
“Kinolumison tungus pogun sandad id pogun diti om koyuyuon pomoomogunon di monginulu-nulu, tisan rahat dau di agayo om tongo’ pulou di koimbayat, apatut kopio tongo’ popoburu’ sastera om ‘budayawan’ momoguno pionponu’ kosuulon dilo’ momonsoi sinupuan di olumis om ongosonong.
“Kohondot dilo’, pinomilian Kota Kinabalu sabaagi mananwalai Tadau Sastera Ko-19, unsikohon kopio. Kalansanan ababayan diti kaanu papabantug seni om sastera, boros om koubasanan tulun Sabah kumaa nayatan nasional om pomogunan,” ka disio ontok pinopoimagon Tadau Sastera Ko-19 id Hotel Promenade, do hiti di ksoodop.
Hajiji pinapatahak Gaa’ Bakti Sastera Gapena 2023 kuminaa di Presiden Tinan Bahasa om Sastera Sabah (Bahasa), Datuk Jasni Matlani.
Boyoon Montiri minoboros, buuk miagal antologi puisi, koleksi cerpen om novel, o paagalan, nopo nga’ kogugunaan kesusasteraan i kiharo ampawong agayo id mogigiyon, lolobi no nung monunurat dilo’ nopo nga’ songulun sasterawan di nabantug.
“Sabaagi songulun i orohian kesusasteraan Melayu, orohian oku mintong id Sabah diti kiharo ogumu’ monunurat toi karyawan okon nopo ointutunan, nga’ abantug om ondoson. Pasanganu tokou ogumu’ monunurat om ‘penyair’ miagal di Hasyuda Abadi, Jasni Matlani, Juri Durabi, Siti Rahmah G Ibrahim, Abdul karim Gullam, mamarait nopo wookonk mantad diolo’.
“Di toun 60an gisom 70an, pasanganu tokou di Jamdin Buyung, K.Bali, Saidi Lampoh (S.Mala), Ismail Abbas (Amil Jaya), M.A. Rahman, Noraini Haji Salleh om ogumu’ po. Nga’ ngaran ngaawi’ dilo’ amu’ sinimbuat gisom nayatan nasional miagal di tongo’ ngaran angagayo miagal di Abdullah Hussain, Arenawati, Usman Awang, Shahnon Ahmad, Anwar Ridwan om i Lim Swee Tin.
“Mantad dilo’, opurimanan ku, norikot nodi timpun, tongo’ penyair om monunurat mantad Sabah do pointangaon kumaa nayatan nasional,” ka disio.
Hajiji pinapatahak Gaa’ Bakti Sastera Gapena 2023 kuminaa di sasterawan Sabah, Datuk Jamdin Buyong kopihondot Ababayan Kinopoimpuunan Tadau Sastera Ko-19.
Kohondot dilo’, kalansanan disio kogompitan karyawan om popoburu’ seni kaanu poposindak po do kaganaan seni om sastera, boros om koubasanan id pogun Sabah.
“Kopiongoi di inggisaman Sabah Maju Jaya (SMJ) id kopoburuan koubasanan mogisusuai tinaru id Sabah, bohogian Kotinanan Koubasanan Pogun Sabah (LKNS) pinapatantu’ turu’ tingkananon montok poindalanon, wookon dilo’ pendigitalan seni koubasanan, ponondulian gompi’ koubasanan, ponolidikan om koposuratan koubasanan om nogi’ kopoinggayaan seni om pongumoligan harta intelek.
“Otumbayaan oku nogi’, kaparagaton boros om sastera id Sabah diti kotilombus kointalang sabba pasanganu tokou tinan i aparagat kopio popoburu’ boros om sastera. Kalansanan pamaramaian Tadau Sastera diti kosili ponukod kumaa angkab lobi kagayo montok poposili Sabah sabaagi ‘Dataran Boros Sastera om Koubasanan’ i bobos oponsol id ponongkoiyonon diti,” ka disio.
Kopihondot ababyaan dilo’ pinapahabar po nogi’ isio do koporintaan pogun monimbang iso’ gaa’ pinotomod kumaa popoburu’ sastera id Sabah.
“Hal diti nopibarasan no miampai di Datuk Ariffin (Montiri Sains, Tiknologi om Inovasi Sabah, Datuk Mohd. Ariffin Mohd. Arif),” ka disio.
Suai ko’ i Mohd. Ariffin, nokotindapou nogi’ i Presiden Gapena, Datuk Zainal Abidin Borhan om Puru Kotinanna Mongungulud Dewan Bahasa om Pustaka Malaysia po nogi’ Presdien Tinan Bahasa om Sastera Sabah (Bahasa), Datuk Jasni Matlani.
