Hajiji Haji Noor
TUARAN: Kukumaraja’ koporintaan id pogun diti kiguno tumilombus popoingubas nubasanan karaja’ osonong, kitonggungan om kalantoi i nosili posunduran kumaa koingkawason nimbulayan sosonginan kotinanan, ka di Boyoon Montiri (KM), Datuk Seri Hajiji Haji Noor.
Ka disio, tinonggungan akawas id nayatan pakakaraja’ koporintaan oponsol kopio montok papatantu’ rikoton, ‘visi’ om ‘misi’ koporintaan aanu monigampot om koindalanan poinsonong.
Tumanud disio, Hontolon Palan Kopoburuan Sabah Maju Jaya (SMJ) monugat do waya’ om kopulokison kapatahakan nogi’ kinogompoton osonong kopoindalanan karaja’ di kitonggungan, mooi do aanu ilo’ do popoindalan miagal di napalan do koporintaan.
“Kohondot dilo’ rontob tinonggungan akawas kiguno haro id tikid kukumaraja’ koporintaan montok papatantu’ kinosonongon kapatahakan surupukaraja’ kinaangayan. Hal diti oponsol id kopotontuan mogigiyon kaanu mamaramit asil otopot surupukaraja’ osonong i patahakon do kukumaraja’ koporintaan,” ka disio id ramai pomupusan Ababayan Enhancing Integrity Project (EIP) kopihondot Ababayan Upisor Integriti Bertauliah (Certified Officer) (CeLO) Siri 36, Bil 3 Toun 2023 id Lintuhun Seri Sulaman, do hiti, di tadau baino’. teks boboroson disio binasa’ di Kumoduo Monunurat Koporintaan Pogun (Kopoburuan), Datuk Dr. Ahemad Sade.
Boyoon Montiri minoboros, surupukaraja’ koporintaan nopo nga’ komponen oponsol id kopoindalanan inggisaman koporintaan om angkab rayat di opulokis om otimpas.
“Pakakaraja’ koporintaan apatut papapanau karaja’ om tonggungan miampai poinponu’ kitiu’on om kitinonggungan doid nunu nopo karaja’ di poindalanon. Oponsol kopio yolo’ monilombus tinonggungan montok manahak surupukaraja’ bobos osonong kumaa moomoguno,” ka disio pinoposotol.
Ka disio, tinonggungan okon ko’ id ababayan nopo di kikoyuon susuap, kapanansalaan om sala’ guno kuasa’ nga nogi’ id sunduk kapatahakan om kapatayadan kointalangan lolobi no id media sosial.
“Kaantaban kumaa koporintaan om surupukaraja’ koporintaan nopo nga’ mongilag kointalangan di amu’ otopot, osoding i kapamabak pisompuruan om koponinong waya’ araat kumaa mogigiyon, montok monginggirot tinonggungan surupukaraja’ koporintaan pogun.”
Hajiji minoboros, kopoindalanan ababayan ‘Pegawai Integriti Bertauliah’ montok upisor koporintaan pogun diti nopo nga’ wookon inggisaman Koporintaan Pogun id kopoinggirotan waya’ om kopulokison kapatahakan nogi’ naangayan kopoindalanan osonong di lobi kitonggungan.
Otumbayaan isio ababayan Pegawai Integriti Bertauliah i kumoinsan nogi’ pohoroo’ dilo’ koponginggirot po do koponguludan tinonggungan surupukaraja’ koporintaan pogun kosuul no id kopotontuan kopoingubasan, kopoinginanan, pongilaan om kopohimaganan ruputan sala’ pogoyuon susuap toi ‘tatatertib’ nogi’ kopomuwaraan bohogian koponguludan id sunduk tinonggungan.
Ka disio, Koporintaan Pogun toririmo poingukab montok misokodung miampai Suruhanjaya Pongilagan Susuap Malaysia om manahak tonggungan di akawas id inggisaman manangod susuap, kapanansalaan om sala’ guno kuasa’ id tikid nayatan surupukaraja’.
Ababayan om pingludaan tilombuson popoindalan id inggisaman monginggirot kopurimanan tikid puru surupukaraja’ koporintaan om mogigiyon kohondot koponsolon manamong om popoingubas tinonggungan id koposion om pakarajaan, ka disio.
Hajiji nga’ lumansan ababayan Pegawai Integriti Bertauliah dilo’ aanu monilombus do timpu dumontol montok mongimbulai lobi po kogumu’ Upisor Integriti Bertauliah id Sabah id inggisaman popoinginan do kopongubasan tinonggungan kumaa kukumaraja’ koporintaan om mogigiyon.
Kopiongoi di kogunaan popoinsingubas tinonggungan id pogun diti, pinaatag disio mooi do tinimungan Upisor Integriti Bertauliah Pogun Sabah tilombuson papagaras om silihon songinan kotinanan tinonggungan id siriba’ kapanamangan Monunurat Koporintaan Pogun.
