Dr. Joachim (tanga’, poindikau), Isnin (kaapat, gibang, poindikau) om Dr. Jamili (kotolu, wanan, poindikau) guminambar pongingitanan id Ramai Kinopoimaganan Pitimungan PBT Tounan Pogun Sabah, di konihab.
KOTA KINABALU: Bohogian Kikuasa’ Kinoiyonon (PBT) unsubon poposili pogogoyuon sabaagi tingkananon id koposodiaan palan ‘strategik’ diolo’ sompoopori.
Kumoduo Boyoon Montiri II po nogi’ Montiri Koporintaan Koiyonon om Pomuwalaian, Datuk Seri Dr. Joachim Gunsalam minoboros, iti oponsol montok mongidu’ pogogoyuon kumaraja’ amu’ poinponu’ ginawo, ‘don’t care attitude’, ‘not sharing responsibilities’, ‘not delegating works’, om ‘unnecessary delays’.
Ka disio, suai ko ilo’, PBT nga’ kiguno nogi’ moningkanan kumaa kotinanan, ilo’ nopo nga’ moningkanan kumaa kopoingkawasan waya’ PBT id kapatahakan surupukaraja’ om monuridong PBT montok sumili lobi kiginoris monokitopong.
Potilombus dino, ikonomi, hinombo sunduk ikonomi songkoiyonon silihon do pawaya’an id kopoburuan songkoiyonon, ka disio, i minoboros, PBT kiguno monuridong kosuulon koimbayatan songkoiyonon om monumboyo’ imanon mogigiyon nogi’ mongingkanan hal id watas PBT dilo’.
Ka disio, sandad posorili nga’ kiguno silihon do tingkananon ilo’ nopo nga’ miampai monuridong koyuon pososorili’ di poinggompi’, monuridong PBT i opoduli’ di kopomogompian po’ompus sandad posorili’ id kopoindalanan koburuon om ponguludan ‘perbandaran’; mogigiyon ilo’ nopo nga’ mongimbulai mogigiyon i kisinangal, poposuul kogompitan mogigiyon om kabaalon I haro id nayatan mogigiyon nokoiyonon id kopoburuan om panalasaian kobolingkahangan perbandaran; om pendigitalan PBT ilo’ nopo momoguno kosuulon sistem kointalangan id kopoindalanan PBT. Iti koponguhup mongingkawas kopulokison PBT id kapatahakan surupukaraja’ kumaa mogigiyon.
“Koposodiaan palan strategik kiguno wonsoiyon do koinsanai PBT. Ilo’ silihon puralan osuul id kopoindalanan hontolon PBT dilo’,” ka disio ontok pinopoimagon Ramai Kinopoimaganan Pomupusan Pitimungan Bohogian Kikuasa’ Koiyonon Tounan Pogun Sabah montok toun 2023 id Nexus Resort & Spa Karambunai, do hiti, di konihab (8tw Kosiam).
Dr. Joachim minoboros, suai ko ilo’, tinonggungan id kopoindalanan karaja’ PBT mositi’ no do silihon sabaagi hal oponsol.
“Koponguludan koonuan, kopoindalanan tadau-adau kiguno poindalanon miampai lobi kotulid om kitonggungan om pointalang. Koposodiaan Palan Magada’ Susuap Kotinanan (OACP) mositi’ no do wonsoiyon di tikid PBT i haro id pogun diti.
“Mantad haro ralan diti, amu’ kosuayan PBT i haro id pogun diti kapanahak surupukaraja’ bobos osonong montok mogigiyon songkoiyonon,” ka disio.
Nokopogulu, minoboros isio, haro apat hal om kaantaban agayo otoguang PBT id kapatahakan surupukaraja’ bobos osonong kumaa mogigiyon id kinoiyonon sompoopori.
Kumoiso’, ka disio, nopo nga’ kopulokison PBT montok maganu laang kohondot kosimbanon miampai otimpas om koposodiaan surupukaraja’ mimpau moomoguno di ‘responsive’, ‘efektif’ om kiwaya’.
Koduo, kogoosan PBT id popiadang kopoburuan om monilombus kotilombuson om kinotomohon sandad om kotolu, koonuan do PBT id koponguludan kousinan om kopongimbulayan ikonomi nokoiyonon.
Kaapat, komilaan PBT id kopoburuan mogigiyon om popironit piromutan strategik id pialatan mogisusuai mongingigit tonggungan, ka disio.
Dr. Joachim lumansan mooi do pitimungan diti kapanahak mogisusuai toilaan, mongimbulai koinsanai kobolingkahangan om kaantaban i tohuri nopo nga’ kaanu mogihum ralan montok papagaras PBT id pogun diti.
Pinoposorou nogi’ isio kumaa koinsanai momumuruan PBT do sosonginan PBT di osonong nopo nga’ kiguno haro koyuyuon miagal do kogoosan poposodia’ surupukaraja’ perbandaran di osonong; monumboyo’ imanon nokoiyonon; kiginoris mongingkawas sosio ikonomi nokoiyonon; kiginoris mongulud kousinan miampai osonong; om kaanu popiadas koburuon om kotilombuson pososorili’.
Minanangkabayahan kumaa koinsanai i nakatanud pitimungan diti gisom kinoompokon, kalansanan disio nunu i naanu po’ompus pitimungan dilo’ kosili sukuon id kopoingkawasan naangayan om kinalantaion PBT soira’ koguli’ kumaraja’ id watas diolo’ sompoopori.
Nokotindapou nogi’ i Monguhup MOntiri I, Datuk Isnin Aliasnih; Monunurat Pointatap Komontirian, Datuk Dr. Jamili Nais; Kumoduo Monunurat Pointatap II, Faridah Giau; Presiden Kounsol Kakadayan Sandakan (MPS), Henry Idol, tongo’ Upisor Eksekutif om sitaf KKTP.
