Hajiji Haji Noor
TAWAU: Kiginumu’ 3,963 lansanon mogigiyon (Luguan Adat) id Sabah kaanu pulampai 48 pihatus koingkawason elaun tikid wulan mimpuun wulan Kosiam toun diti.
Boyoon Montiri, Datuk Seri Hajiji Haji Noor pinapahabar elaun tikid wulan Luguan Watas pinoingkawas kuminaa RM3,500 mantad RM2,700 (29.6 pihatus kinoingkawason), Luguan Mamasok Pogun (KAN) kuminaa RM2,500 mantad RM1,700 (47.1 pihatus kinoingkawason)), Mobi’ Luguan Mamasok Pogun (WKAN) kuminaa RM1,300 mantad RM900 (44.4 pihatus kinoingkawason), Molohingon Kampung (KK) om Kapitan kuminaa RM1,200 mantad RM700 (71.4 pihatus kinoingkawason).
Laang dilo’ kapanahak koundaran kumaa 57 Luguan Watas, 272 KAN, 648 WKAN, 2,810 KK om 176 Kapitan id poliliput pogun.
Boyoon Montiri minomonsoi kinapahabaran dilo’ ontok Ababayan Mirumo-rumo miampai lansanon om puru Gagasan Sabah Bohogian Parlimen Tawau om Kalabakan, do hiti di tadau baino’.
Wookon padaahan kinopoingkawasan diti nopo nga’ sabaagi pongokunan nindikohon apatang Luguan Adat id mogigiyon, kaampai tonggungan diolo’ sabaagi hakim id Kuut Mamasok Pogun (MAN) om manampung pabalanjaan ontok tumindapou mitingan, kurusus om ababayan pinotomod id labus watas.
“Koporintaan Pogun popoimagon tonggungan oponsol Luguan Adat sabaagi lansanon id nayatan siriba’ om kinoingkawason dilo’ kihontolon mongingkawas sunduan Luguan Adat montok manahak surupukaraja’ di poinponu’ tinonggungan kumaa mogigiyon.
“Kumoduo nopo, alaid no ilo’ do noundorongan miampai pinogintongan di tohuri winonsoi di toun 2013. Elaun diolo’ kakal amu’ nokosimban naamot balanja’ kosusukupan koposion nokoingkawas,” ka disio.
“Iti nopo nga’ kointalangan tonggungan koporintaan montok monumboyo’ kogugunoon toinsanan boogian id kapanahakan surupukaraja’ di osonong, kopiongoi di angkab Hontolon Sabah Maju Jaya,” ka disio.
