Hajiji Haji Noor
KOTA KINABALU: Norikot nodi timpu dau do pomogunaan kapal tawan aiso’ papamanau (unmanned aerial vehicle – UAV) poinggarason montok popoinggirot po do ponuridongan om tonggungan Watas Koumoligan Pinotomod Tisan Kosilahon Sabah (ESSCom), ka di Boyoon Montiri (KM), Datuk Seri Hajiji Haji Noor.
Ka disio, ilo’ montok papatantu’ kinoponuridongan ESSCom sabaagi momuruan koumoligan id koponguludan kopoindalanan panamangan koumoligan id Zon Oumolig Sabah Kosilahon (ESSZone) aanu popoingkawas lolobi no id sunduk ginaras om kotoundaan tinimungan koumoligan.
Tumanud disio, watas ESSZone kopuli 10 koiyonon, mantad Kudat gisom Sandakan om koyuon diti kikaantaban kopio.
“Kohondot dilo’, pomogunaan UAV diti okon nopo ko’ kopoingkuri’ kopogundoronokan koumoligan kumaa puru tinimungan koumoligan di poingkaraja’ nga nogi’ kopongingkawas kopogkuasaan tawan kosuul no id kopoindalanan panamangan id koiyonon tisan kosilahon Sabah om lobi kapaampai moomoguno tohuri (end user),” ka disio id Ababayan Sodop Kapamagatangan Media ESSCom Toun 2023 id Hotel Hilton di tadau Kaapat. Teks boboroson disio binasa’ di Monguhup Montiri kumaa Boyoon Montiri, Datuk Abidin Madingkir.
Hajiji i po nogi’ Ponorikohon Puruankuasa’ ESSZone om kitonggungan kumaa ESSCom minoboros, pomogunaan aset om tiknologi wagu miagal do UAV kopoinggaras po do kapanamangan koumoligan id Sabah kosuul no id ESSZone.
Tumanud diiso, iti kouhup monginggirot po do panamangan koumoligan id piwolitan om kowoigan pogun montok monoibau nunu-nunu koyuon toi hal di amu’ korohian,” ka disio pinoposotol.
Ka disio, mantad kopodulianan Koporintaan Perpaduan kumaa kotundunan kukumaraja’ ESSCom, Luguan Montiri, Datuk Seri Anwar Ibrahim pinapahabar kopoobian kousinan soginumu’ RM40 riong montok mongingkawas kogogonopan om kosusukupan kuarters kukumaraja ESSCom id Lahad Datu.
“Pounsikou kumaa di Luguan Montiri mantad kopodulianan om kalansanan inggisaman diti kopomoruhang po do sunduan kukumaraja’ id ESSCom do papatahak di bobos osonong id kopongumoligan bantug pogun,” ka disio pinoposotol.
Minongomi kes koponugatan Sulu, minoboros isio, kootusan do Kuut Takawas The Hague i minongobi’ kumaa Malaysia nopo nga’ kinalantaion agayo kumaa koporintaan Malaysia do poinpuli om Sabah o kosuul no.
Hajiji pinoposotol, iti kopokito do Koporintaan Malaysia amu’ insan undoronong minggisom mongumolig bantug, koumoligan om koponsolon pogun.
“Ingkaa nogi’ Koporintaan Pogun Sabah, amu’ insan papasaga’ nombo-nombo boogian i mumbal mangasou kopotutan om bantug Sabah.”
Daamot dilo’, Hajiji minongunsub koinsanai momoguno media mooi tumilombus monuduk mogigiyon maya’ ponuratan habar montok sumili mogigiyon di oupus pogun nogi’ pasanganu ginirot tinan di akawas id kopongumoligan bantug pogun, lolobi podi kosuul no montok pogun Sabah.
“Otopot nopo, aiso’ isai i kaanu mogolim koponsolon tonggungan media id koponudukan mogigiyon maya’ ponuratan doid media massa. Ka do tukadan ‘mato pena lobi katarom ko’ mantad mato padang’ kohunung kopio sabab maya’ ponuratan, media kaanu posimban pomusarahan mogigiyon. Om nogi’ ginaras mato pen kapatantu’ kootuon kotungagon sosonginan pomogunan,” ka disio pinoposotol.
Ka disio, batos Koporintaan Perpaduan manahak kosimbayanan media nopo nga’ iso’ iman-imanon i mamaso poindalanon.
Ka disio kawagu, atag kopongiduan ‘Akta Mesin Cetak dan Penerbitan’ nogi’ kopogintongan kawagu ‘Akta Anti Berita Tidak Benar dan Akta Komunikasi dan Multimedia Malaysia’ kosili kotinanan kumaa tonggungan om tinopot koporintaan monuridong koyuyuon media di osimbayanan papatahak kointalangan kitonggungan kumaa rayat om koporintaan.
“Ogumu’ hal i kiguno adangon pogulu monumboyo’ iman-imanon diti lolobi no kinoloputon kointalangan gam-gama’ kinoburuon tiknologi koposimban karalano’ om koyuon pomumusorou sukod wagu tokou.
“Amu’ tokou mimang tongo’ kointalangan amu’ otopot kaampawong sukod wagu tokou. Mantad dilo’, montok monoibau kobolingkahangan diti pogun momoguno iso’ sistom i manamong intong suang media mooi do i no kointlangan kitonggungan, otopot om kotumbayaan i korikot kumaa sukod wagu diti. Kalansanan iman-imanon kosimbayanan media diti aanu mamagampot do timpu dumontol,” ka disio pinoposotol.
