Hajiji pinopoindalan gimik kinopoimpuunan Tadau Koperasi Negara id SICC, Kota Kinabalu di tadau baino.
KOTA KINABALU: Boyoon Montiri (KM), Datuk Seri Hajiji Haji Noor otumbayaan kapapanahan koperasi id Sabah i kiharo 1,707 koperasi poinrojistor miampai ginumu’ puru lobi 350,000 id siriba’ Suruhanjaya Koperasi Malaysia (SKM) koponguhup monoibau komosikinan ‘tegar’ id pogun diti.
“Oondos oku sabab Sabah haro ginumu’ koperasi poinrojistor kumoduo bobos akawas id pomogunon posusuhut do Selangor miampai ginumu’ nindopuan RM750 riong.
“Iti kopokito kapapanahan koperasi id Sabah nakaanu pinapapanau tonggungan dau om pinopotoluod miampai po’ompus sabaagi iso’ mantad ejen kosunion sosio ikonomi i kikosiwatan momupus komosikinan tegar,” ka disio ontok Tadau Koperasi Negara id Longkod Konvensyen Sompomogunan Sabah (SICC), do hiti di tadau baino’.
Lobi kopoondos haro apat koperasi mantad Sabah ilo’ nopo Koperasi Pembangunan Usahasama Masyarakat Maju Sabah Berhad, Koperasi Kakitangan Sawit Kinabalu Sabah Berhad, Koperasi Borneo Malaysia Berhad om Koperasi Usahawan Tawau Berhad nokoulud id Indeks 100 Koperasi Bobos Osonong Malaysia toun nakatalib, ka di Hajiji.
Hajiji pinopotunui Gaa’ Koperasi Bobos Osonong kuminaa songulun mantad tolu mamaramit ontok Tadau Koperasi Negara id SICC, Kota Kinabalu di tadau baino’.
“Kounsikohan om bayahan kumaa koinsanai koerasi id Sabah. Orohian oku do kokito mooi do lobi kogumu’ koperasi mantad Sabah koulud id Indeks 100 Koperasi Bobos Osonong Malaysia do toun dumontol,” ka disio om otumbayaan ginumu’ diti aanu mongingkawas soira’ haro kopurimanan om korohian sumompuru koperasi sabaagi karalano’ pamamaasi i koponoluod kumaa koburuon sosio ikonomi pogun.
“Iti nopo sabab no koperasi nopo nga’ ponginsomokan di kiwaya’ okon nopo ko’ id kopongunsuban kopoburuan siktor kousahawanan, nga nogi’ kaanu papapanau tonggungan agayo id koponguhupan tinimungan B40 monoibau poginumbalan kinoingkawason kos balanja’ koposion,” ka disio.
“Angkab om inggisaman Koporintaan nopo “to facilitate and not to frustrate (montok monguhup okon i ko’ papakaus),” do monokodung poposodia’ kooturan i osuau koperasi mooi do karaja’ koperasi miampai pinotomod id pogun diti nopo nga’ kiginoris mumang buru’ om koponokitopong,” ka disio.
Kopiongoi di Palan Kopoburuan Hontolon Sabah Maju Jaya (SMJ) i mimpau di tolu posunduran osuul ilo’ nopo nga’ Pomutanaman, Pomorunan om Ponombuluyan, ka disio, Koporintaan Pogun lumansan do kapapanahan koperasi id pogun diti kapaganu kosiwatan miampai poinsonong di inggisaman om ponguhupan kousinan i pinosodia’ id kopoburuan siktor pongindopuan koperasi di ampayaton.
“Ingkaa nogi’ id sunduk ponguhupan kousinan om tabung kopoburuan modal koperasi, pinoilo oku di kaawagu diti Komontirian Kopoburuan Mongungusaha’ om Koperasi (KUSKOP) maya’ SKM pinopolulus ponguhupan Tabung Modal Insan Pusingan SKM Toun 2023 (TMPSKM) kuminaa duo koperasi id Sabah miampai kinopoobian koinsanai kiginumu’ RM25.9 riong id upa’ kinopomolian aset tana’ piasau sawit kiginayo 1,500 ekar om nogi’ premis pongindopuan runcit.
“Suai ko ilo’, SKM nga’ pinopolulus nogi’ ponguhupan kuminaa duo tinan koperasi maya’ ababayan koponguhupan i ointutunan Ababayan eFAST kiupa’ geran kopoburuan pongindopuan kumaa tongo’ koperasi i kinimbulayan montok popoinggirot pongindopuan,” ka disio.
Hajiji minoboros, tonggungan koperasi kosili pomugonop om miuhup miampai Koporintaan om siktor swasta id koponuangan kosiwatan ngaawi’ “untapped business opportunities (kosiwatan pongindopuan i amu’ po noukaban)” i haro id kopoburuan pogun miampai potingkanan.
Hajiji miampai di Montiri KUSKOP Datuk Ewon Benedick minooi intong iso’ mantad sulap pokikitanan koperasi.
“Kohondot dilo’ mimang oku koinsanai kapapanahan koperasi id Sabah tilombuson papagaras, mongingkawas ginoris monokitopong om monongkiahou kosiwatan ikonomi di poinsodia’.
“Id sabah pasanganu tokou ogumu’ ponit koperasi i popoburu’ sosio ikonomi mogigiyon, i potuu kapaampai peruncitan toi ababayan ponombuluyan om kopomogompian sandad posorili. Pogun diti opuawang do intodonon sandad posorili’ om sosio koubasanan i kopongimbayat ogumu’ tutumombului rumikot i potuu mantad suang toi labus pogun,” ka disio.
Tumanud disio, pinongiwangan kawagu tongo’ wawaya’an sumuang piwolitan pogun nakapanahak waya’ osonong om mongunsub kotondulionon siktor ponombuluyan hinombo Sabah nokoposurat ginumu’ 1.73 riong kinorikotan tutumombului toun nakatalib om toun diti pikikiro 2.2 riong tulun miampai kapanahak nindopuan soginumu’ RM4.1 bilion.
Nunsub disio koperasi id Sabah do momoguno poinsonong kinosimbuaton pomorunan ponombuluyan, i kopongimbulai mogisusuai kosiwatan pongindopuan oluyungan miagal do songkoduonon, songkoduonon kampung, padsakaian, restoran, taman om kadai tandamato.
Boyoon Montiri minamaramit nogi’ kinaampayatan soginumu’ 168 komulakan mantad 19 pogun Asia Pasifik id Pitimungan Limunduk Koperasi Komulakan Asia Pasifik (APCYS) i binuruan do Sabah, i montok kumoinsan nogi’ pinaharo id Malaysia, mimpuun ko 27 giosm 30tw Kohopod om Duo toun diti.
