Dr. Jeffrey miampai lalansanon totuo pinopoimpuun Konvensyen om Kouliton Toun Ko-17 STAR id ITCC, Penampang, konihab.
PENAMPANG: Parti Solidariti Tanah Airku (STAR) pointounda’ popoungkakat lobi kogumu’ calun koonduan, komulakan om suokd wagu montok tumanding id Pomilian Agayo Pogun (PRN) Sabah Ko-17 duo toun obontol.
Kumoduo Boyoon Montiri po nogi’ Presiden STAR, Datuk Seri Dr. Jeffrey Kitingan poingkuro po pinoposotol parti dilo’ popo’iliu nodi calun bohogian dilo’ i otootopot nokosodia’.
“Parti tokou (STAR) poingukab montok monumboyo’ kopokionuan tinimungan dilo’,” ka disio i minoboros do kiguno yolo’ poposodia’ kogoosan mooi lobi kogumu’ calun aanu potigulaion parti.
Dr. Jeffrey minoboros dilo’ sabaagi simbar komi nayatan guas Wiramuda, Wiranita om Wiramaja id Konvensyen Nasional STAR om Kapamaramaian Kouliton Toun Ko-7 ki’uhu “Star Sabah 2030 & Beyond” id ITCC, do hiti di konihab.
Tumanud disio, parti dilo’ kiguno poposodia’ tongo’ calun sumowoli montok popoimulok parti sabab kopomuruanan laid kopinsin om lansanon wagu kiguno potigulaion.
Pinosotol di Dr. Jeffrey, montok papagaras parti, tongo’ lansanon parti dilo’ apatut do amu’ tumalahan parti suai toi lansanon parti tambalut popowonsoi dilo’ montok STAR.
“Kiguno tokou popowonsoi sondiri’,” ka disio i po nogi’ Puru Parlimen Keningau om Puru Lintuhun Undangan Pogun (ADUN) Tambunan.
Dr. Jeffrey potilombus dino minomuhondom naangayan parti dilo’ i minimpuun mantad aiso’, iso’ tindikohon, talib dino nosili duo, onom om nung onuan kosiwatan kosili do 12 toi lobi.
Konvensyen sangadaud ilo’ pinapawalad turu’ boboroson i nakapaampai di Luguan Wiramuda, Kong Soon Choi; Luguan Wiranita, Datuk Flovia Ng; duo Timbang Presiden, Datuk Abidin Madingkir om Datuk Annuar Ayub Aman nogi’ tolu Kumoduo Presiden, Datuk Kapitan Stephen Teo, Datuk Robert Tawik om i Datuk Ellron Alfred Angin.
